तनहुँ । तनहुँको सदरमुकाम दमौलीमा आजदेखि प्रथम व्यास मेयर कप फुटबल प्रतियोगिता सुरु भएको छ । व्यास नगरपालिका नगर खेलकुद समितिको आयोजनामा व्यास नगरपालिका-३ बिपी वनबाटिका खेल मैदानमा इलेभेन ए साइड फुटबल प्रतियोगिता सुरु भएको हो ।

दमौलीमा १५ वर्षपछि इलेभेन साइड फुटबल प्रतियोगिता सञ्चालन गरिएको नगरप्रमुख वैकुण्ठ न्यौपानेले बताए । उनका अनुसार खेल मैदानको अभावमा सेभेन ए साइड फुटबल मात्रै हुने गरेकामा नगरपालिकाको सक्रियतामा मैदान स्तरोन्नतिपश्चात् एलेभेन ए साइड प्रतियोगिता गर्न सम्भव भएको हो ।

प्रतियोगिताको उद्घाटन गर्दै नगरप्रमुख न्यौपानेले नगरपालिकाले खेलकुदलाई प्राथमिकता दिएको बताए । उनले खेलकुदका विभिन्न विधामा खेलका गतिविधि अगाडि बढाइएको भन्दै वडास्तरबाटै खेलकुद सञ्चालन गर्दा दक्ष खेलाडी उत्पादन गर्न सहयोग पुग्ने विश्वास व्यक्त गरे ।

प्रतियोगिताका लागि नगर खेलकुद विकास समितिबाट पाँच लाख र प्रत्येक वडाबाट एक-एक लाख खर्च हुनेछ । प्रतियोगितामा नगरका १४ वटै वडाको सहभागिता रहेको छ ।

प्रतियोगितामा प्रथम हुने टोलीले एक लाख, द्वितीय हुने टोलीले ७५ हजार र तृतीय हुने टोलीले ५० हजार नगद पुरस्कार प्राप्त गर्नेछन् । त्यस्तै, उत्कृष्ट खेलाडी, सर्वाधिक गोलकर्ता र उत्कृष्ट गोलरक्षकलाई पनि पुरस्कृत गरिनेछ ।