काठमाण्डु– प्रधानमन्त्री बालेन शाह (बालेन) ले आफू कालो चश्मा लगाएरै प्रतिनिधिसभा बैठकमा उपस्थित हुने...

पुरा पढ्नुहाेस्

global ime bank Long Banner Ad

डेटा मार्फत नेपालको पदयात्रा पर्यटनलाई सुरक्षित बनाउने ट्रेलम्यापरको पहल

1.3K
shares

काठमाडौं । नेपालको पदयात्रा पर्यटनलाई सुरक्षित, व्यवस्थित र प्रविधिमैत्री बनाउने उद्देश्यसहित नेपाली स्टार्टअप ट्रेलम्यापरले संरचित तथ्यांक (डेटा) को प्रयोगबारे विशेष प्यानल छलफल आयोजना गरेको छ ।

द ब्रिटिस कलेज इन्क्युबेसन सेन्टरबाट इन्क्युबेट भएको ट्रेलम्यापरले जुलाई ३१ मा काठमाडौंको नक्सालस्थित काठमाडौं म्यारियट होटलमा ‘संरचित तथ्यांकले नेपालको पर्यटनलाई कसरी अझ सुरक्षित र स्मार्ट बनाउन सक्छ ?’ विषयक कार्यक्रम आयोजना गरेको हो । कार्यक्रममा पर्यटन, संरक्षण, विपद् व्यवस्थापन, शिक्षा तथा सञ्चार क्षेत्रका करिब ३५ प्रतिनिधिको सहभागिता रहेको थियो ।

कार्यक्रममा नेपाल पर्यटन बोर्डका सुधन सुबेदी, नेसनल ट्रस्ट फर नेचर कन्जर्भेसनका अशोक सुबेदी, ट्रेकिङ एजेन्सिज एसोसिएसन अफ नेपाल (टान) का प्रमुख कार्यकारी अधिकृत रामचन्द्र सेढाईं तथा जीआईएस र विपद् जोखिम व्यवस्थापन विज्ञ राजु चापागाईं प्यानलिस्टका रूपमा सहभागी थिए । कार्यक्रमको सहजीकरण अच्छता शाक्यले गरेकी थिइन् ।

छलफलमा नेपालको पर्यटन क्षेत्रमा उपलब्ध पदयात्रा मार्ग, मौसम, सुरक्षा तथा आपत्कालीन सेवासम्बन्धी सूचना विभिन्न निकायमा छरिएर रहेको र त्यसले पदयात्रीको सुरक्षामा चुनौती थपिरहेको विषयमा केन्द्रित बहस भएको थियो । सहभागीहरूले यस्ता तथ्यांकलाई एकीकृत र प्रमाणीकरण गरिएको प्रणालीमार्फत उपलब्ध गराउन सके पदयात्रा पर्यटन थप सुरक्षित र प्रभावकारी बन्न सक्ने धारणा राखेका थिए ।

छलफलका क्रममा पदयात्री सुरक्षाका लागि आवश्यक धेरै सूचना सरकारी तथा सम्बन्धित निकायसँग भए पनि ती तथ्यांक अद्यावधिक नभएको, प्रमाणीकरणको अभाव रहेको वा फरक–फरक प्रणालीमा सीमित रहेको विषय उठाइएको थियो । साथै, मौसम मापन केन्द्रको सीमित संख्या, स्थानीय तथा संघीय निकायबीच तथ्यांक आदानप्रदानको कमी तथा दुर्गम हिमाली क्षेत्रमा सञ्चार पहुँचको समस्या पनि प्रमुख चुनौतीका रूपमा औंल्याइएको थियो ।

ट्रेलम्यापरका प्रमुख कार्यकारी अधिकृत तथा सह–संस्थापक स्वर्णिम रत्न शाक्यले नेपालको पदयात्रा पर्यटनलाई सुरक्षित बनाउन तथ्यांकमा आधारित निर्णय प्रणाली आवश्यक रहेको बताए ।

‘हजारौं पदयात्रीको सुरक्षा र समग्र अनुभव सुधार गर्न यस्ता छलफल अत्यन्त आवश्यक छन् । नेपालको पर्यटन क्षेत्र लामो समयदेखि विभिन्न तह र निकायमा विभाजित अवस्थामै छ । तथ्यांकलाई एकीकृत गरेर प्रभावकारी निर्णय लिन सकिए पर्यटन क्षेत्रलाई थप सुरक्षित र प्रतिस्पर्धी बनाउन सकिन्छ,‘ उनले भने ।

उनका अनुसार ट्रेलम्यापर केवल एउटा मोबाइल एप मात्र नभई पदयात्रासम्बन्धी महत्वपूर्ण सूचना एकै स्थानमा उपलब्ध गराउने डिजिटल प्लेटफर्म हो । यसले पदयात्रीलाई मार्ग, आवास, आपत्कालीन सम्पर्क तथा अन्य आवश्यक जानकारी सहज रूपमा उपलब्ध गराउँछ ।

कार्यक्रममा जीआईएस तथा विपद् जोखिम व्यवस्थापन विज्ञ राजु चापागाईंले नेपालको पर्यटन क्षेत्रमा नयाँ तथ्यांक सङ्कलनभन्दा पनि उपलब्ध तथ्यांकलाई व्यवस्थित र प्रमाणीकरण गर्नु अहिलेको मुख्य आवश्यकता रहेको बताए ।

‘सबै कुरा योजनामै सीमित छ । अब आवश्यक कुरा भनेको उपलब्ध तथ्यांक पहिचान गरेर त्यसलाई प्रमाणित र प्रयोगयोग्य बनाउनु हो,‘ उनले भने । द ब्रिटिस कलेज इन्क्युबेसन सेन्टरका प्रमुख गणेश पौड्यालले ट्रेलम्यापरको यात्राले नेपालमा नवप्रवर्तन र स्टार्टअप इकोसिस्टमको सम्भावना देखाएको बताए । एक साधारण अवधारणाबाट सुरु भएको परियोजनाले अहिले पर्यटन, संरक्षण, सरकार र प्रविधि क्षेत्रका सरोकारवालालाई एउटै मञ्चमा ल्याउन सफल भएको उनको भनाइ थियो ।

कार्यक्रम प्रश्नोत्तर तथा नेटवर्किङ सत्रसँगै सम्पन्न भएको थियो । सहभागीहरूले नेपालको पर्यटन सुरक्षा, विपद् व्यवस्थापन र तथ्यांक एकीकरणका क्षेत्रमा आगामी दिनमा सहकार्य गर्ने प्रतिबद्धता पनि व्यक्त गरेका थिए ।

ट्रेलम्यापर नेपालमै विकास गरिएको मोबाइल एप हो, जसले पदयात्रा मार्ग, ट्रेल वेपोइन्ट, आवास, आपत्कालीन सम्पर्क र आवश्यक जानकारीलाई एउटै प्लेटफर्ममा उपलब्ध गराउँछ । हाल एप सञ्चालनमा रहेको छ भने विभिन्न पदयात्रा मार्गमा यसको फिल्ड परीक्षणसमेत सम्पन्न भइसकेको कम्पनीले जनाएको छ ।

कम्पनीले आगामी दिनमा वास्तविक समय (रियल–टाइम) मा मौसम, ट्रेलको अवस्था तथा सम्भावित जोखिमबारे जानकारी दिने थप स्मार्ट फिचर विकास गरिरहेको जनाएको छ । पर्यटन क्षेत्रका विज्ञहरूका अनुसार यस्ता डिजिटल समाधानले नेपालको पदयात्रा पर्यटनलाई सुरक्षित, विश्वसनीय र अन्तर्राष्ट्रिय बजारमा अझ प्रतिस्पर्धी बनाउन मद्दत पुग्न सक्छ ।