वासिङ्टन डीसी । अमेरिका र इरानबीच भोलि अर्थात् शुक्रबार ऐतिहासिक सम्झौता हुने भएको छ ।

झन्डै १०७ दिन लामो युद्धलाई विराम दिँदै इरान र अमेरिका बीच स्विट्जरल्याण्डमा ऐतिहासिक सम्झौता हुने बताइएको छ । उक्त सम्झौताबारे अमेरिकाले प्रारम्भिक सहमतिपत्र सार्वजनिक गरेको इरानी मिडियाले जनाएका छन् ।

इरान अब्जर्भरका अनुसार अमेरिकाले इरानसँग भएको सम्झौतापत्रको आधिकारिक पाठ जारी गरेको हो।

१४ बुँदे सम्झौता:

१. लेबनानसहित सबै मोर्चामा अमेरिका, इरान र उनीहरूका सहयोगीबीच तत्काल स्थायी युद्धविराम।
२. एकअर्काको आन्तरिक मामिलामा हस्तक्षेप नगरी सार्वभौमसत्ता र क्षेत्रीय अखण्डताको पारस्परिक सम्मान।
३. पारस्परिक सहमतिमा विस्तार गर्न सकिने गरी ६० दिनभित्र अन्तिम सम्झौता।
४. अमेरिकाले ३० दिनभित्र नौसेना नाकाबन्दी हटाउने, इरानले ढुवानी पुनःस्थापना गर्ने तथा अमेरिकी सेनाको फिर्ता प्रक्रिया सुरु गर्ने।
५. फारसी खाडी र ओमान सागरबीच सुरक्षित व्यापारिक नेभिगेसन सुनिश्चित गर्ने।
६. होर्मुज जलडमरूको भविष्य व्यवस्थापनबारे अन्तर्राष्ट्रिय कानुनअनुसार छलफल गर्ने।
७. अमेरिका र क्षेत्रीय साझेदारले इरानका लागि ३०० अर्ब डलरभन्दा बढीको आर्थिक विकास योजना स्थापना गर्ने।
८. संयुक्त राष्ट्रसंघ र आईएईए सहित सबै प्रतिबन्धहरू हटाउने।
९. इरानले आणविक हतियार विकास नगर्ने प्रतिबद्धता जनाउने तथा युरेनियम भण्डारण व्यवस्थापन गर्ने।
१०. अन्तिम सम्झौता नभएसम्म यथास्थिति कायम रहने।
११. इरानी तेल तथा बैंकिङ क्षेत्रमा अमेरिकी प्रतिबन्धहरू हटाइने।
१२. इरानी सम्पत्तिहरू क्रमशः पहुँचयोग्य बनाइने।
१३. संयुक्त कार्यान्वयन तथा अनुगमन संयन्त्र स्थापना गरिने।
१४. प्रमुख प्रावधान कार्यान्वयनपछि अन्तिम सम्झौता अघि बढाइने र संयुक्त राष्ट्र सुरक्षा परिषद्बाट अनुमोदन गरिने। एजेन्सी

प्रकाशित समय : ०७:३९ बजे