काठमाण्डु– प्रधानमन्त्री बालेन शाह (बालेन) ले आफू कालो चश्मा लगाएरै प्रतिनिधिसभा बैठकमा उपस्थित हुने...

पुरा पढ्नुहाेस्

global ime bank Long Banner Ad

सरकारको काममा पारदर्शिता होस् : जेनजी थापा (भिडियो सहित)

2.25K
shares

काठमाडौं । जेनजी नेतृ सरिस्मा थापाले जेनजी आन्दोलन सत्ता प्राप्तिका लागि नभई सुशासन, पारदर्शिता र संस्थागत सुधारका लागि भएको बताएकी छन् । स्वतन्त्र नागरिक अभियानले आयोजना गरेको कार्यक्रममा बोल्दै उनले जेनजी आन्दोलनमार्फत संस्थागत सुधार र रिफर्मेशन खोजिएको उल्लेख गरिन् ।

उनले भनिन्, ‘हामीले जेनजी आन्दोलनमार्फत संस्थागत सुधार र रिफर्मेशन खोजेका थियौँ । यो आन्दोलन सुशासनका लागि भएको हो भन्ने भाषा सबैका अगाडि राख्न चाहेका हौँ । दण्डहीनताको अन्त्य होस्, सार्वजनिक सेवा प्रणालीमा सुधार होस्, सरकारको काममा पारदर्शिता होस् र ‘सरकार कसैको होइन, जसको कोही छैन उसको राज्य छ’ भन्ने भाषामा अगाडि बढोस् भन्नका लागि आन्दोलन भएको हो । तर ‘मलाई बोल्न दे सरकार’ भनेर सुरु भएको आन्दोलन चुपचापमा बदलिएको हामीले थाहा पाउन सकेका छैनौँ ।’

थापाले सरकारलाई प्रश्न गर्दा आफूहरूलाई विरोधीको रूपमा चित्रित गरिएको गुनासो गरिन् ।
उनले भनिन्, ‘हामी अहिले सरकारलाई प्रश्न गर्न खोजिरहेका छौँ । तर सरकारलाई प्रश्न गर्दा सरकारकै विरोधीका रूपमा प्रस्तुत गरिएको छ । राम्रो गर्न चाहानेलाई विरोधी भन्ने भाषा परिवर्तन गराइ हामीमाथि हेरिएको छ । हामीले सडकमा लडेर रगत बगाएर ल्याएको सरकार हो नि त । हामीले नै प्रश्न नसोधे कसले सोध्ने ? आजको सरकारलाई प्रश्न सोध्नु भनेको हिजोको सरकारलाई राम्रो भन्न खोजेको होइन । हिजोको सरकारले गलत गरेकै कारण जेनजी आन्दोलन भएको हो ।’

उनले जेनजी आन्दोलनले सत्ता नभई १० बुँदे सम्झौताको कार्यान्वयन माग गरेको स्पष्ट पारिन् ।
‘जेनजीले मागेको १० बुँदे सम्झौता हो, कुनै पनि सत्ता होइन । सम्झौता पूरा गर्न सक्दैन भने बालेन सरकारले ८० जना मरेका मान्छेको ज्यान फिर्ता दिन सक्नुपर्छ । १० बुँदे सम्झौतामा प्रधानमन्त्री पद मागिएको होइन, मतअधिकारका लागि चुनाव मागिएको हो । संविधान सुधारको बहस होइन, संविधान सुधार आयोग मागिएको हो । जेनजी परिषद्बाट नेपालभरका जेनजीहरूको आवाज समेट्ने थलोका रूपमा जेनजी परिषद् मागिएको हो,’ उनले भनिन् ।

कार्यक्रममा जेनजी नेतृ मुस्कान खातुनले पनि आन्दोलनका क्रममा युवाहरूले ज्यान गुमाउँदा समेत जेनजी पुस्ताको आवाज सम्बोधन हुन नसकेको बताइन् । उनले भनिन्, ‘जेनजी आन्दोलनका खातिर कति युवाहरूले ज्यान गुमाए तर जेनजी पुस्ताको आवाज पूरा हुन सकेको छैन । जेनजी युवाहरूको भावना बुझ्न सक्ने सरकार बनेको छैन जस्तो महसुस भइरहेको छ । आन्दोलनमा घाइते भएकाहरू अझै अस्पतालमा छटपटाइरहेका छन् । तर पनि समाज परिवर्तन हुन सकेको छैन । सरकारसमक्ष माग राख्दा सरकारको विरोध गरेको भन्ने सुनिन्छ, तर त्यो विरोध होइन ।’

यस्तै, वाणिज्य, आपूर्ति तथा उपभोक्ता संरक्षण विभागका पूर्वमहानिर्देशक कुमार दाहालले देशमा नीतिको अभाव नभई इमान्दारिताको कमी रहेको बताए । उनले भने, ‘यो हाम्रो राष्ट्र हो, यसको पुरानो नीति छ । एउटा मात्र चीजको खाँचो छ, त्यो हो इमान्दारिता । मैले ३५ वर्ष प्रशासकका रूपमा काम गरेँ, त्यहाँ केही रोकतोक छैन, सबै कुरा स्पष्ट छन् । तर हामी काम गर्दैनौँ । त्यहाँभित्र ठूला–ठूला गेम प्लान भइरहेका छन् अझै पनि । मैले केही परिवर्तन भएको देखेको छैन । परिवर्तनका लागि तपाईं–हामी नै परिवर्तन हुन जरुरी छ ।’