जब सत्तामा भएको कुनै व्यक्तिका कतुर्तहरु प्रमाणसहित सार्वजनिक हुन थाल्छन्, त्यसपछि त्यो व्यक्ति एकाएक बर्बराउन थाल्छ । के बोल्ने, नबोल्न होस् हराउन थाल्छ । तथ्यलाई छोप्न आवेग, आक्रोश र निम्नस्तरको गालीगलौजमा उत्रिन थाल्छ । तपाईँलाई लाग्दैन, ठ्याक्कै यस्तो अहिले धरान उपमहानगरपालिकाका मेयर हर्क साम्पाङले गर्दैछन् ।

आजभन्दा झण्डै दुईबर्षअघि चुनावको सरगर्मी चढेको थियो । धरान उपमहानगरको मेयरमा हर्क साम्पाङ स्वतन्त्र उम्मेदवारको हैसियतमा मैदान छिरेको थिए । दलहरुभन्दा अलि भिन्न उनको चुनावी प्रचारको शैलीले धेरैलाई प्रभावित पारेको थियो । उनी एक्लै एउटा माइक समाएर चुनावी प्रचारमा निस्किन्थ्ये । न कुनै कार्यकर्ताको भीड, न कुनै तडकभडक । सामान्य ढंगबाट आफ्ना एजेन्डा सुनाउँदै टेम्पो चढेर हिड्ने साम्पाङ त्यसैकारण जनतालाई मन परेका हुन् । तथापी साम्पाङलाई राष्ट्रिय मुलधारको मिडियाले ‘स्पेस’ दिएको थिएन । तर हामीले त्यो बेला पनि ‘आन्दोलनको अर्काे नाम हर्क साम्पाङ’ भन्दै सामाग्री प्रकाशित गरेका थियौं । जुन अहिले पनि अरकाईभमा खोज्दा भेटिन्छ । जसले निकै चर्चा पनि पाएको थियो । खानेपानीकै मुद्दा उठाएर धराने जनताका पक्षमा उनले गरेको कामकै कारण उनी धरानको नेतृत्वमा आउनुपर्छ भन्ने अरुजस्तै चाहना हाम्रो पनि थियो । तर दुईबर्ष बित्यो मेयर साम्पाङ आन्दोलनको नभई विवादको अर्काे नाम बन्दैछन् ।

अहिले उनीमाथि केही गम्भीर आरोपहरु सार्वजनिक भएका छन् । श्रमदानका नाममा धरानको करोडौं रकम स्वाहा पारेको आरोप छ । सुम्निमा-पारुहाङ प्रतिमा निर्माणस्थल नजिकै प्लटिङ गरि जग्गा दलालीलाई सहयोग गर्न खोजेको आरोप छ । अरु त अरु, नक्कली माओवादी बनेर साम्पाङले चन्दा उठाएको विगतसमेत ताजा बनेर सार्वजनिक भएको छ ।

अहिले जति पनि विषयहरु सार्वजनिक भएका छन्, यी हचुवाका भरमा सार्वजनिक भएका होइनन् । खोज पत्रकारिता केन्द्रको लामो अनुसन्धान र प्रमाणसहित तथ्यलाई केलाएर सार्वजनिक गरिएको हो । तर साम्पाङले यसलाई गालीगलौजको विषय बनाए । जबकि गलत कुरा कसैले सार्वजनिक गर्छ भने पत्रकार नै भएपनि उसलाई कारबाही गर्ने बाटो छ । त्यसका लागि उनी तथ्य प्रमाणसहित आफुलाई निर्दाेष सावित गर्न अड्डा अदालत जान सक्छन् । तर त्यसमार्फत प्रतिवाद गर्नुको सट्टा उनी आफैमाथि प्रश्न उठ्ने गरि ‘लातको भूत बातले मार्न’ खोज्दैछन् ।

सार्वजनिक व्यक्ति भएर आफ्नो विरोध गर्ने जोहीमाथि भिड्नै पर्ने उनको स्वभाव छ । अदालतले दिएको आदेशलाई समेत ‘मान्दिन’ भन्छन् । सरकारले केन्द्रमा बनाएका ऐन कानुनलाई ‘त्यस्ता नाथे’को संज्ञा दिएर ‘मान्दिन’ भन्छन् । के एउटा जनताको नेतालाई नियमविपरित चल्ने छुट छ ?

तर यसले उनको व्यक्तित्व र भोलिको राजनीतिक भविष्यमाथि सिधा असर गर्नेछ । हर्क साम्पाङ त्यो व्यक्ति बन्नुपर्छ, जसबाट प्रभावित भएर भोलि सयौं स्वतन्त्रहरु देश बनाउने अभियानमा जुट्न प्रेरित हौउन् । तर अवस्था यस्तो बन्दैछ, हर्क साम्पाङको कार्यशैली देखेरै स्वतन्त्रप्रति मानिसहरुको विश्वास उडिरहेको छ । स्थानीय निकायमा स्वतन्त्रप्रति जुन खाले आकर्षण बढिरहेको थियो, त्यो हर्क साम्पाङहरुकै कारण माटोमै धूलिसात बन्दैछ । यिनीहरुमा देखिएको अहंकारले गर्दा जनताले चाहेको प्रत्यक्ष निर्वाचित कार्यकारी भोलि गएर देश र जनताको लागि अभिशाप बन्नसक्छ भन्ने संकेत गर्दैछ ।

प्रकाशित समय : १४:०० बजे