कञ्चनपुरको दोधारा चाँदनी नगरपालिका–३ बडुवाल टोलमा हात्तिको बथानले सात विघा जग्गाको धानखेती सखाप पारेको छ ।

हरेक दिन राति बस्तीमा पस्ने हात्तीको बथानले स्थानीयको धानवालीमा ठुलो क्षति गरेको वडा अध्यक्ष हरिसिंह धनाडीले जानकारी दिए । हात्ती भगाउनकै लागि यहाँका स्थानीय रातभर जाग्राम बस्ने गरेको उनले बताए । “दिनहुँ राति २०र२२ वटा सङ्ख्यामा रहेको हात्तीको बथान बस्तीमा पस्छ,” उनले भने , “हात्तीले यहाँ हैरान गरेको छ स्थानीयले सुत्न पाएका छैनन् ।”

भारतको दुधुवा राष्ट्रिय निकुञ्जबाट आउने जङ्गली हात्तीको बथानले गाउँ पसेर धानबाली र मकैमा नोक्सान गर्न थालेपछि हात्ती भगाउन यहाँका स्थानीय रातभर जाग्राम बस्न थालेका हुन् । “हामीले राति उक्त बस्तीमा प्रहरीको डिउटी नै राखेका छौँ,” अध्यक्ष धनाडीले भने , “हात्ती भगाउन वडा कार्यालयबाट टर्च, साइरन स्थानीयलाई उपलब्ध गराएका छौँ ।” रातिको समयमा भारतको दुधुवा राष्ट्रिय निकुञ्जबाट हात्तीको बथान बच्चासहित दिनहुँ बडुबाल टोलमा पस्ने गरेको स्थानीय बताउँछन् ।

प्रकाशित समय : १९:२४ बजे