नेकपा (माओवादी केन्द्र)को केन्द्रीय कमिटिको बैठकमा पार्टीका केन्द्रीय सदस्यहरुलाई दिनको दुईवटा ‘स्टाटस’ लेख्न सर्कुलर जारी गरेको थियो । तर आँफैले गरेको सर्कुलरको माओवादीका पदाधिकारीहरुले नै धज्जी उडाएका छन् । आँफैले गरेको निर्णय पदाधिकारीहरुले नै मानेको देखिदैन ।

साउन २१ गते केन्द्रीय समितिको चौथो पूर्ण बैठकको समापन गर्दै माओवादी केन्द्रले नेतृत्वको प्रतिरक्षामा जोड दिने सामग्री बिहान र बेलुका गरी दिनमा कम्तीमा दुईवटा ‘स्टाटस’ पोष्ट गर्नुपर्ने निर्णय गरेको थियो । माओवादी केन्द्रले सामाजिक सञ्जालमा लेख्दा कति शब्दको लेख्नुपर्ने सम्मको सर्कुलेसन गरेको थियो ।

केन्द्रले त्यस्ता पोष्ट सार्वजनिक मिडियामा समाचार बन्ने सक्ने गरी कम्तीमा छ–सात लाइनको हुनुपर्नेछ बताएको थियो । पार्टीका उपाध्यक्ष तथा प्रवक्ता कृष्णबहादुर महराले पार्टीको पक्षमा सामाजिक सञ्जालमा सक्रिय हुन सर्कुलर गर्ने निर्णय गरेको बताएका थिए ।

आफ्नो पार्टीको निर्णय बताउने महराकै फेस्बुक पेज हेर्यो भने ६ दिन अगाडि देखि केही पनि पोष्ट गरेको देखिदैन । महराले पूर्वसभामुख भएर एउटा शोक वक्तव्य ६ दिन अगाडि फेस्बुकमा लेखेका छन् भने त्यो बाहेक अन्य केही पनि लेखेको देखिदैन ।
महराको मात्र होइन पार्टीका अन्य पदाधिकारीले पनि सामाजिक सञ्जालमा केही लेखेको पाईदैन । उनीहरुको सामाजिक सञ्जाल हेर्ने हो भने कयौं दिन देखिको केही पोष्ट नभएको देखिन्छ । पोष्ट भएकाहरुको पनि आफ्नो व्यक्तिगत काम र आँफूसँग सम्बन्धित विषयको मात्र देखिएको छ । जबकी केन्द्रीय कमिटिले पार्टीको प्रचार वा सरकारले गरेको कामको प्रचार गर्ने दिनको २ वटा पोष्ट गर्ने भनेको थियो ।

पार्टीका वरिष्ठ उपाध्यक्ष नारायणकाजी श्रेष्ठको सामाजिक सञ्जाल पनि त्यस्तै छ । श्रेष्ठले करिब १० दिन अगाडि मात्र आफ्नो सामाजिक सञ्जालमा मिटरब्याज सम्बन्धि विधेयक दुवै सदनबाट पारित भएको लेखेका थिए । त्यस यता कुनै पनि पोष्ट आएको छैन ।

श्रेष्ठ आँफै सरकारमा सामेल समेत छन् । उनलाई उपप्रधान सहित गृह मन्त्रालयको जिम्मेवारी दिएको छ । तर पनि उनले आफ्नो सामाजिक सञ्जालमा सरकारले वा आफ्नो मन्त्रालयले गरेको केही पनि कुराहरु पोष्ट गरेका छैनन् ।

हामीले यो समाचार तयार पार्दा उपमहासचिव जनार्दन शर्माले बागमती प्रदेशको पाँचौ पूर्ण बैठकको कुरा पोष्ट गरेका छन् । तर उनले आजको पोष्ट भन्दा ३ दिन अघि मात्र सामाजिक सञ्जालमा पोष्ट गरेका छन् । तर त्यो पोष्ट पनि पार्टीको वा सरकारले गरेको राम्रो कामको प्रचार नभई अन्तर्राष्ट्रिय युवा दिवसको शुभकामना दिएका थिए ।

पार्टी केन्द्रीय कार्यालय र प्रधानमन्त्रीको सचिवालयले उत्पादन गरी पठाएका प्रचार सामग्री (स्टाटस, अडियो, भिडियो, ग्राफिक्स डिजाइन) प्रत्येक केन्द्रीय सदस्यले अनिवार्य पोष्ट गर्नुपर्ने माओवादीका निर्णय भएपनि त्यो निर्णयलाई पदाधिकारीले नै त्यो निर्णय मानेका छैनन् ।