नेपाली काँग्रेसको केन्द्रीय कार्यसमिति बैठक आज सकिँदैछ । साउन २ गतेदेखि चलेको बैठकको निर्णय लेखनको जिम्मा पाँच नेताले पाएका छन् । महामन्त्रीद्वय गगन थापा, विश्वप्रकाश शर्मा, नेता रमेश लेखक, प्रवक्ता प्रकाशशरण महत र प्रचार विभाग प्रमुख मीन विश्वकर्मालाई जिम्मेवारी दिइएको छ ।

सभापति शेरबहादुर देउवाको निवासमा बसेको पदाधिकारी बैठकले उनीहरुलाई जिम्मेवारी दिएपनि नेताहरुबीच अझै गलफत्ती चलिरहेको छ । मंगलबार बसेको बैठकले निर्णय लेखनमा सहमति जुटाउन नसकेपछि बुधबार फेरि पदाधिकारी बैठक बसेर निर्णयलाई अन्तिम रुप दिने तयारी गरिएको विषय समते सार्वजनिक भएको छ।

पदाधिकारी बैठकले तयार पारेको निर्णय दिउँसो ४ बजे बस्ने केन्द्रीय कार्यसमितिको बैठकले पारित गर्नेछ । काँग्रेसले आगामि मंसिरमा नीति महाधिवेशन गर्ने विषयमा भने समझदारी जुटाएको छ । पार्टी महाधिवेशनको ६ महिनाभित्र गर्नुपर्ने नीति महाधिवेशन डेढ वर्षसम्म पनि हुन सकेको थिएन ।

महामन्त्री गगन थापाले प्रस्तुत गरेको एक वर्षे कार्यायोजना र २०८२ सालभित्रै पार्टीको १५ औं महाधिवेशन गर्ने प्रस्तावबारे नेताहरुबिच सहमति जुट्न सकेको छैन ।