मन्त्रिपरिषद्ले भन्सार विभागको महानिर्देशकसहित ४४ जना सहसचिवको सरुवा गरेको छ । फाजिलमा रहेका कतिपय सहचिवहरूलाई दरबन्दीमा पठाएको छ भने कतिपयलाई फाजिलबाट अतिरिक्त समूहमा राखेको छ ।

मंगलबार बसेको मन्त्रिपरिषद् बैठकले उनीहरूलाई सरुवा गरेको हो । भन्सार महानिर्देशक चक्रबहादुर बुढालाई पाँच महिनामा सरुवा गरेर संस्कृति पर्यटन तथा नागरिक उड्डयन मन्त्रालय पठाइएको छ । उनी गत मंसिर २९ गते भन्सार महानिर्देशकमा सरुवा भएका थिए ।

सरकारले १८ जना सहसचिवलाई ‘कामकाज गर्नेगरी’ भन्ने भाषा प्रयोग गरेर खटाएको छ । कामकाजको अर्थ तत्काल सरुवा नगरी काम मात्र गर्नेगरी सरुवा गरिएको हो । ६ जना सहसचिवलाई गृह मन्त्रालय सरुवा गरिएको छ ।

संघीय मन्त्री अमनलाल मोदीसँग मनमुटाव भएपछि सरुवा मागेका कमलप्रसाद भट्टराईलाई नागरिक उड्डयन मन्त्रालय सरुवा गरिएको छ । मन्त्री मोदीले भट्टराईलाई प्रशासन महाशाखाबाट हटाएपछि संघीय मन्त्रालय छाडेका हुन् । भट्टराईले सम्हाल्दै आएको जिम्मेवारी सहसचिव हेमराज तामाङलाई दिइएको थियो ।

कोशी प्रदेशको मुख्यमन्त्री कार्यालयमा फाजिलमा रहेका ज्ञानेन्द्रप्रसाद ढकाललाई संघीय मामिला तथा सामान्य प्रशासन मन्त्रालयमा अतिरिक्त समूहमा सरुवा गरिएको छ । विराटनगर महानगरपालिकाका प्रमुख प्रशासकीय अधिकृत विष्णुप्रसाद कोइरालालाई कर्णाली प्रदेशको मुख्यमन्त्री कार्यालयमा सरुवा गरिएको छ ।

लामो समय काम नदिई अर्थ मन्त्रालयमा राखिएका रघुराम बिष्टलाई भौतिक पूर्वाधार मन्त्रालयमा सरुवा गरिएको छ । मधेश प्रदेशमा रहेका राजेन्द्र पराजुलीलाई विराटनगर महानगरपालिकाको प्रमुख प्रशासकीय अधिकृतमा सरुवा गरिएको छ ।

नेपालगन्ज उपहानगरपालिकाका प्रमुख प्रशासकीय अधिकृत बद्रीनाथ गैह्रेलाई गृह मन्त्रालय सरुवा गरिएको छ । चार महिनाभन्दा बढी समय कामै नदिई गृह मन्त्रालय राखिएका सुमन घिमिरेलाई लुम्बिनी मुख्यमन्त्री कार्यालयमा कामकाजका लागि खटाइएको छ ।

प्रकाशित समय : ०६:२५ बजे