काठमाडौं महानगरपालिकाका मेयर बालेन्द्र (बालेन) शाहविरूद्ध अदालतको अपहेलना गरेकाे विषयमा मुद्दा दर्ता भएको छ । अधिवक्ता दिपकराज जोशीले मेयर बालेनविरूद्ध सर्वोच्च अदालतमा अवहेलना मुद्दा हालेका हुन् ।

सर्वोच्चका प्रवक्ता विमल पौडेलका अनुसार मेयर बालेनविरूद्धकाे साे मुद्दामा आजै न्यायाधीश हरिकृष्ण कार्कीको इजलासमा सुनुवाइ भएको छ । मेयर बालेनले ‘संविधान संशोधन गरेर नक्सा पास गर्ने अधिकार अदालतलाई दिउँ’ भन्दै सामाजिक सञ्जालमा स्टाटस लेखेका थिए । उनकाे साे अभिव्यक्तिले अदालतको अवहेलना गरेको जोशीको तर्क छ ।

केही समयअघि काठमाडौं महानगरले नर्भिक अस्पतालले भाडामा लिएको सार्वजनिक जग्गामा बनाएको ‘अवैध’ संरचना हटाउन खोजेको थियो । नर्भिकले अदालतमा मुद्दा हालेपछि तत्काल ती संरचना नहटाउन अदालतले आदेश दिएको थियो । उक्त आदेशपछि मेयर बालेनले नक्सा पासको काम पनि अदालतलाई दिनुपर्ने भन्दै स्टाटस लेखेका थिए ।

प्रकाशित समय : १५:१५ बजे