जनकपुरधामबाट दिउँसै एक महिलाको दुई लाख लुटेर फरार भएका दुईजनालाई बिहीबार प्रहरीले पक्राउ गरेको छ । धनुषाका एसपी वसन्त रजौरेका अनुसार पक्राउ पर्नेमा लक्ष्मीनियाँ गाउँपालिका-७ का २० वर्षीय जीतेन्द्रप्रसाद साह र २१ वर्षीय दीपेन्द्र मण्डल रहेका छन् ।

विदेशबाट पठाएको दुई लाख गत सोमबार मिल्स एरियास्थित एभरेष्ट बैंकबाट झिकेर फर्किदै गरेकी सबैला नगरपालिका-४ घर भई हाल जनकपुरधाम उपमहानगरपालिका-१ मा बस्दै आएकी शर्मिला देवीको साथबाट रकम लुटेर उनीहरु फरार भएका थिए ।

प्रहरीले जीतेन्द्रको साथबाट लुटिएको मोबाइल र ५४ हजार नगद तथा दीपेन्द्रको साथबाट ७८ हजार बरामद गरेको छ । दुवैजनाले रकम लुटेपछि भागबण्डा गरेका थिए । धनुषा प्रहरीले उनीहरुको साथबाट प्रदेश २-०२-००५ प ८५ नम्बरको मोटरसाइकलसमेत बरामद गरेको छ ।

प्रकाशित समय : १०:१६ बजे