खोटाङ। दसैँको बिदा सकिएलगत्तै जिल्ला प्रशासन कार्यालयमा सेवाग्राहीको चाप बढेको छ । दसैँ मनाउन घर आएका नागरिक नागरिकता, राहदानी, राष्ट्रिय परिचयपत्र, नाबालक परिचयपत्र, दलित तथा जनजाति प्रमाणितलगायत सेवा लिन कार्यालयको भीड बढेको हो ।

जिल्ला प्रशासन कार्यालयका अनुसार बुधबार मात्रै ८१ जनाले नयाँ नागरिकता लिएका छन् । जसमध्ये ४९ पुरुष र ३२ महिला छन् । त्यस्तै, ३२ जनाले नागरिकताको प्रतिलिपि लिएका छन् । प्रतिलिपि लिनेमा २० पुरुष र १२ महिला छन् ।

कार्यालयबाट ११ जनाले राहदानी लिएका छन् भने २८ जनाले राहदानीका लागि नाम दर्ता ९इनरोलमेन्ट० गराएका छन् । यसैगरी, ६३ जनाले राष्ट्रिय परिचयपत्रका लागि विवरण दर्ता गराएका छन् भने एक जनाले नाबालक परिचयपत्र बनाएका छन् ।

यस्तै, छ वटा सिफारिस प्रमाणित गरिएको छ भने अन्य निकायमा आठवटा पत्र पठाइएको छ । नागरिक एपमार्फत प्राप्त २० वटा गुनासो फछ्र्योट गरिएको जिल्ला प्रशासन कार्यालयले जनाएको छ ।

दसैँको बिदामा घर आएका अधिकांश नागरिक चाडपर्वपछि आफ्नो कर्मथलो फर्कने क्रममा सदरमुकाम आएर नागरिकता, राहदानी, राष्ट्रिय परिचयपत्र तथा अन्य सिफारिस र कागजात बनाउने गरेका छन् । यसले गर्दा कार्यालयमा सेवाग्राहीको चाप बढेको प्रमुख जिल्ला अधिकारी महेशकुमार गुरुङले जानकारी दिए ।

कतिपय फाँटमा सेवाग्राहीले एकअर्काको पालो नमिचून् भन्ने उद्देश्यले कार्यालयले टोकन प्रणाली लागू गरेको छ । जिल्लाका अन्य सरकारी कार्यालयको तुलनामा जिल्ला प्रशासन कार्यालयमा अहिले सेवाग्राहीको चाप बढी देखिएको छ ।

खोटाङमा सातौँ सोल्मा कप फुटबल प्रतियोगिता

सोल्मा स्पोर्टस् क्लब खोटाङले दिक्तेलमा आयोजना गरेको अन्तर वडा कप पुरुष फुटबल प्रतियोगितामा दिक्तेल रुपाकोट मझुवागढी नगरपालिका–२ सोल्माले विजयी यात्रा सुरु गरेको छ ।

सातौँ संस्करणको ‘सोल्मा अन्तर वडा कप पुरुष फुटबल प्रतियोगिता–२०८३’मा दिक्तेल रुपाकोट मझुवागढी नगरपालिका–१ दिक्तेललाई हराउँदै वडा नं २ सोल्माले आफ्नो विजयी यात्रा सुरु गरेको हो ।

सोल्मा स्पोर्टस् क्लबको आफ्नै खेलमैदानमा आयोजना गरिएको प्रतियोगिताको पहिलो खेलमा सोल्माले एक गोल गर्दा वडा नं २ दिक्तेल गोलरहित मैदानबाट बाहिरिएको छ ।

प्रतियोगिताको पहिलो हाफमा वडा नं २ सोल्माका जर्सी नं ७ का खेलाडी देवान राईले गरेको एक गोल नै प्रतियोगिताको निर्णायक गोल बनेको हो ।

यही कात्तिक १५ गतेसम्म सञ्चालन हुने प्रतियोगीताका विजेताले नगद एक लाख २२ हजार २२२, उपविजेताले रु ७७ हजार ७७७ र सेमीफाइनलिष्ट दुई टोलीले जनही नगद ३३ हजार ३३३ को साथमा ट्रफी, मेडल र प्रमाणपत्र प्रदान गरिने क्लबका अध्यक्ष ध्रुवविक्रम राईले जानकारी दिए ।

यस्तै, उत्कृष्ट खेलाडीलाई रु पाँच हजार ५५५ तथा उत्कृष्ट गोल रक्षक, उत्कृष्ट डिफेण्डर, सर्वाधिक गोलकर्ता र उत्कृष्ट प्रशिक्षकलाई जनही नगद दुई हजार २२२ को साथमा ट्रफी, मेडल र प्रमाणपत्र प्रदान गरिने आयोजकले जनाएको छ ।

सोल्मा स्पोर्टस् क्लबले निर्माण गरेको खेलमैदानमा आयोजना गरिएको प्रतियोगिताको उद्घाटन जिल्ला समन्वय समितिका प्रमुख सनबहादुर राईले थियो । उद्घाटन समारोहमा उडाइएको बेलुनमा झुण्ड्याइएको ब्यानर भेट्ने व्यक्तिलाई क्लबले नगद रू पाँच हजार ५५५ दिने घोषणा गरेको छ ।