कोरोनाभाइरस संक्रमण भई गम्भीर अवस्थाका बिरामीको उपचारका लागि प्रदेश २ मा भेन्टिलेटर र आईसीयूको अभाव भएको छ । प्रदेश २ को स्वास्थ्य निर्देशनालयका सह–निर्देशक विजय झाका अनुसार प्रदेशका आठ जिल्लामध्ये पर्साको वीरगन्ज, धनुषाको जनकपुर र सप्तरीको राजविराज सरकारी अस्पतालमा मात्रै भेन्टिलेटर छन् ।

पर्साको वीरगन्जस्थित नारायणी अस्पतालमा तीनवटा, जनकपुरको प्रादेशिक अस्पतालमा दुईवटा र सप्तरीको राजविराजस्थित गजेन्द्रनारायण सिंह अस्पतालमा चारवटा भेन्टिलेटर छन् तर त्यहाँ आईसीयू कक्ष भने छैनन । ‘आईसीयू नभएपछि भेन्टिलेटरको कुनै अर्थ नहुने सह-निर्देशक झाले बताए ।

प्रदेशको अस्थायी राजधानी जनकपुरधाममा दुईवटा मात्रै भेन्टिलेटर छन् । ती भेन्टिलेटर कहिल्यै खाली हुँदैनन् । गम्भीर प्रकृतिका कोरोना संक्रमितलाई भेन्टिलेटरमा राखेर उपचार गरे अन्य बिरामीहरु प्रभावित हुने भएकाले कोरोना विशेष अस्पतालका लागि आफ्नै भेन्टिलेटर आवश्यक भएको धनुषाका आइसोलेसन संयोजक डा. जामुनप्रसाद सिंहले बताए । सिंहका जनकपुरमा तत्काल पाँचवटा भेन्टिलेटर आवश्यक छ ।

प्रदेश २ मन्त्रिपरिषदको वैशाख ८ गते बसेको बैठकले ३० वटा भेन्टिलेटर खरिद गर्ने निर्णय गरी सामाजिक विकास मन्त्रालयमार्फत बजेटसमेत निकासा गरिसकेको छ । तर, तीन महिना बितिसक्दा पनि खरिद नगरिँदा कोरोना संक्रमितको उपचारमा प्रभावित भएको छ ।

साउन १० गते जनकपुरधामस्थित प्रादेशिक अस्पताल भर्ना भएका सहिदनगर नगरपालिका ८ डुमरियाका ३८ वर्षका पुरुषलाई भेन्टिलेटर अभावका कारण बीपी कोइराला स्वास्थ्य विज्ञान प्रतिष्ठान धरान लैजाँदै गर्दा बाटोमै मृत्यु भएको थियो । भेन्टिलेटर नभएकै कारण पर्सामा ६, बारा र रौतहटमा २/२ तथा धनुषा, महोत्तरी र सप्तरीमा १/१ गरी १३ जनाको मृत्यु भइसकेको छ ।

सामाजिक विकासमन्त्री नवलकिशोर साहका अनुसार असार ११ गते मन्त्रालयले ३० वटा भेन्टिलेटर खरिदका लागि टेन्डर आह्वान गरे पनि दरखास्त नपरेकाले खरिद गर्न ढिलाइ भएको बताए । चाँडै पुनः टेन्डर आह्वान गरी भेन्टिलेटरको व्यवस्था गरिने उनले जनाए ।

प्रकाशित समय : १७:०२ बजे