चिनियाँ कम्युनिष्ट पार्टी (सीपीसी) का विदेश विभाग प्रमुख लिउ जियानचाओले नेपाल भम्रण गर्ने भएका छन् । भर्खरै जिम्मेवारी सम्हालेका नवनियुक्त विदेश विभाग प्रमुखले पहिलो विदेश भ्रमणको सुरुआत नेपालबाट गर्न चाहेका हुन् ।

जुन पहिलो साता पार्टी विदेश विभाग प्रमुखको जिम्मेवारीमा आएका जियानचाओले पहिलो विदेश भ्रमणका लागि नेपाल रोज्नुलाई अर्थपूर्ण रूपमा हेरिएको छ । 

भ्रमणबारे औपचारिक रुपमा जानकारी दिइएको छैन । तथापी आगामी आइतबारसम्म उनी नेपाल आइसक्ने बुझिएको छ । त्यसको पुष्टि गर्दै काठमाडौंस्थित चिनियाँ राजदूतावास स्रोतले भन्यो, ‘जिम्मेवारी सम्हालेपछि भाइचारा र पार्टी सम्बन्ध भएका सबै जसो मुलुकमा भ्रमण, भेटघाट र प्रत्यक्ष कुराकानी गर्ने चलन छ । नेपाल त्यो प्रक्रियाको पहिलो देश भएको छ । यसको मतलब चीनले नेपाललाई प्राथमिकतामा राखेको छ भन्ने सन्देश दिन खोजिएको पनि हो ।’

परराष्ट्र मन्त्रालय उच्च स्रोतका अनुसार पनि चार दिने नेपाल भ्रमणका क्रममा उनले राष्ट्रपति विद्यादेवी भण्डारी, प्रधानमन्त्री शेरबहादुर देउवा, नेकपा एमाले अध्यक्ष केपी ओली र माओवादी केन्द्रका अध्यक्ष पुष्पकमल दाहाल प्रचण्डसँग भेट गर्ने निश्चित भएको छ । साथै, सभामुख अग्नी प्रसाद सापकोटासँग पनि उनको भेटघाट हुनसक्ने बताइएको छ ।

स्रोतका अनुसार आगामी संघीय निर्वाचनमा मुलुकका दुई ठूला कम्युनिस्ट पार्टीबीच सम्भव भए एकता र नभए वाम गठबन्धन बनाएर जाने वातावरण बनाउनु पनि उनको भ्रमणको उद्देश्य हो । जिम्मेवारी सम्हालेको केही समयपछि नै उनले ९ असारमा माओवादी केन्द्रका अध्यक्ष प्रचण्डसँग र भोलिपल्ट एमाले अध्यक्ष ओलीसँग भिडियो संवाद गरेका थिए ।

प्रकाशित समय : १४:१० बजे