अमेरिकाको टेक्सासमा एउटा लरीभित्र कम्तीमा ४६ वटा शव भेटिएका छन् । उनीहरू सबै गैरकानुनी रूपमा अमेरिका छिरेका आप्रवासी रहेको अनुमान गरिएको छ ।

स्थानीय सञ्चारमाध्यमका अनुसार लरीबाट कम्तीमा १६ जनालाई गम्भीर हालतमा जीवितै उद्धार गरेर उपचारका लागि अस्पताल लगिएको छ । सामाजिक सञ्जालमा देखिएका तस्बिरमा लरीको आसपास ठूलो संख्यामा उद्धारकर्मीहरू देखिएका छन् ।

एक स्थानीय टेलिभिजनका अनुसार यो लरी सैन एन्टोनियोको दक्षिण पश्चिममा भेटिएकाे हाे । न्यूयोर्क टाइम्सका अनुसार सैन एन्टोनियो प्रहरी डिपार्टमेन्टका अधिकारी लरीको चालकको खोजीमा छन् जो अहिले फरार छन् ।

सैन एन्टोनियो अमेरिका-मेक्सिको सीमाबाट करिब २५० किलोमिटरको दूरीमा पर्छ । टेक्सासका गभर्नर ग्रेग एबान्टले यो भयानक मृत्युका लागि राष्ट्रपति जो बाइडेनलाई जिम्मेबार ठहराएका छन् । उनले यो दर्दनाक घटना खुला सीमा नीतिका कारण भएको बताए ।

मेक्सिकोका विदेशमन्त्री मारसेलो इबरार्डका अनुसार उनको देशका एक अधिकारी घटनास्थलका लागि प्रस्थान गरेका छन् । मृतकहरूको नागरिकताबारे भने कुनै जानकारी प्राप्त नभएको उनको भनाइ छ । अहिलेसम्म मृत्यु कसरी भएको हो भन्ने खुलेको छैन ।

प्रकाशित समय : १५:०८ बजे