पछिल्लो एक सातामा सेयर बजार मापक नेप्से परिसूचक ३०.५४ अंकले घटेकाे छ । अघिल्लो साता १४५.०८ अंकले गिरावट भएको नेप्से परिसूचक यो साता ३०.५४ अंकले घटेको हो ।

गएको साताको अन्तिम कारोबार दिन शुक्रबार २०७८.७० विन्दुमा रहेको नेप्से यो साताको अन्तिम कारोबार शुक्रबारसम्म ३०.५४ अंकले घटेर २०४८.१६ विन्दुमा झरेको छ । साताको पाँच दिन भएको सेयर कारोबारमा चार दिन नेप्से गिरावट हुँदा एक दिन भने वृद्धि भएको थियो । पछिल्लो समय सेयर बजार लामो समयदेखि निरन्तर रूपमा गिरावट हुँदै आएको छ । बजारमा आएको निरन्तर गिरावटका कारण १० महिनाअघि ३२ अंकनजिक पुगेको नेप्से करिब ११५०.६७ अंकले गिरावट आएर २०४८.१६ अंकको विन्दुमा झरेको छ ।

चालु आर्थिक वर्षको सुरुवातसँगै बैंकिङ प्रणालीमा आएको लगानीयोग्य रकम (तरलता)को अभाव तथा नेपाल राष्ट्र बैंकले मौद्रिक नीतिले सेयर धितो कर्जामा लगाएको चार, १२ करोडको नीतिका कारण सेयर बजार घट्दै गएको छ । सरकारले आउँदो आर्थिक वर्षको बजेट ल्याएपछि समेत बजार सुधार हुन सकेको छैन । साताको पहिलो कारोबारको दिन सोमबार नेप्से सूचकमा १२.८९ अंकले गिरावट आएर २०६५.८२ विन्दुमा झरेको थियो । सोमबार कारोबारमा आएका २२८ कम्पनीको ४४ लाख ९ हजार ६९१ कित्ता सेयर एक अर्ब २७ करोड ३३ लाख ८५ हजार २७६ रुपैयाँमा कारोबार भएको थियो ।

साताको दोस्रो कारोबार दिन मंगलबार नेप्से परिसूचक ४५.५९ अंक घटेर २०२०.२३ विन्दुमा झरेको थियो । मंगलबार कारोबारमा आएका २३४ कम्पनीको ३८ लाख ८७ हजार कित्ता सेयर एक अर्ब ३१ करोड २८ लाख ६ हजार रुपैयाँबराबरमा खरिद-बिक्री भएको थियो । बुधबार भने पछिल्लो एक हप्ताभन्दा बढी समयदेखि घट्दै आएको नेप्से परिसूचक ६०.२२ अंकले बढेर २०८०.४४ विन्दुमा पुगेको थियो । बुधबार कारोबारमा आएका २३१ कम्पनीको ५० लाख पाँच हजार कित्ता सेयर एक अर्ब ६४ करोड तीन लाख ५६ हजार रुपैयाँबराबरमा खरिद–बिक्री भएको थियो । बुधबार नेप्सेसँगै कारोबार रकममा समेत सुधार भएको थियो ।

बिहीबारदेखि बजार बढ्ने आकलन गरिए पनि एक दिन पनि टिक्न नपाई बिहीबार नेप्से परिसूचक १७.६४ अंकले घटेर २०६२.८० विन्दुमा झर्‍यो । बिहीबार कारोबारमा आएका २२९ कम्पनीको ४१ लाख ५६ हजार १०४ कित्ता सेयर एक अर्ब ४७ करोड २६ लाख ९० हजार ५५४ रुपैयाँबराबरमा कारोबार भएको थियो । बुधबारको तुलनामा बिहीबार कारोबार रकममा गिरावट आएको थियो ।

साताको अन्तिम कारोबार दिन शुक्रबार नेप्से परिसूचक १४.६४ प्रतिशतले घटेर २०४८.१६ विन्दुमा झरेको छ । शुक्रबार २२९ कम्पनीका ३० लाख ४५ हजार ८३८ कित्ता सेयर किनबेच भएर ८९ करोड ४१ लाख रुपैयाँबराबरको कारोबार भयो । बिहीबारको तुलनामा शुक्रबार कारोबार रकममा पनि गिरावट आयो ।

नेप्से परिसूचकमा ३० अंकभन्दा बढीले गिरावट आउँदा सातामा नेप्सेको कुल बजार पुँजीकरण ४१ अर्बभन्दा बढीले घटेको छ । गएको साताको अन्तिम कारोबार दिन २९ खर्ब ५९ अर्ब रुपैयाँ रहेको नेप्सेको यस्तो पुँजीकरण घटेर २९ खर्ब १७ अर्ब रुपैयाँमा खुम्चिएकाे छ ।