पाहुना टोली युगान्डाले नेपालविरुद्धको महिला टी-ट्वान्टी अन्तराष्ट्रिय सिरिज जितेको छ । यस जितसँगै युगान्डाले ५ खेलको सिरिजमा ३-० को अग्रता बनाएको छ ।

कीर्तिपुरस्थित त्रिविस्थित क्रिकेट मैदानमा बिहीबार तेस्रो टी-ट्वान्टीमा नेपाललाई ६ विकेटले हराउँदै युगान्डाले दुई खेलअगावै सिरिज कब्जा गरेकाे हाे । सिरिजअन्तर्गत आज भएकाे तेस्राे खेलमा नेपालले दिएको १ सय रनको लक्ष्य युगान्डाले १८ ओभर २ बलमा ४ विकेट गुमाएर पूरा गर्‍याे ।

युगान्डाकी केभिन विनोले अविजित रहदै ४२ रन जोडिन् । जेनेट बाबाजीले २७ रन जोडिन् । नेपालकी कविता कुँवरले २ विकेट लिइन् । रुबिना क्षेत्री र इन्दु वर्माले १/१ विकेट लिइन् । त्यसअघि पहिले ब्याटिङ गरेको नेपालले २० ओभरमा ८ विकेट गुमाएर ९९ रन बनायो ।

नेपालका लागि ज्योति पाण्डेले सर्वाधिक ४७ रन जोडिन् । यस्तै कप्तान रुबिना क्षेत्रीले अविजित १८ रन जोडिन् । सिता राना मगर १२ रनमा आउट भइन् । बिन्दु रावल ४, रोमा थापा र डोली भट्टले समान ३/३ रन जोडिन् । इन्दु वर्मा १ रनमा आउट हुँदा सरिता मगर र कविता कुँवर सुन्य रनमा आउट भइन् । सबनम राई १ रनमा अविजित रहिन् ।

युगान्डाकी फियोना कुलुमी, कुन्सी वेको र सराह एकीटेङले २/२ विकेट लिए । पहिलो पटक घरेलु मैदानमा सिरिज खेलिरहेको नेपालले युगान्डासँग भोलि शुक्रबार चौंथो र शनिबार अन्तिम टी-ट्वान्टी खेल्न खेल्नेछ ।

प्रकाशित समय : २२:१३ बजे