global ime bank Long Banner Ad
Global IME

गृहपृष्ठ गंगा सप्तमी पर्व मनाइँदै

गंगा सप्तमी पर्व मनाइँदै

गंगा सप्तमी पर्व मनाइँदै

प्रत्येक वर्ष वैशाख शुक्ल सप्तमीका दिन मनाइने गंगा उत्पत्ति पर्व आज विभिन्न नदीमा विधिपूर्वक पूजा आराधना गरी मनाइँदैछ । द्वापरयुगमा कपिलमुनिको श्रापबाट राजा सगरका ६० हजार छोरा भष्म भएपछि उनका सन्तति भगीरथले पितृ मुक्तिका लागि वर्षौँ तपस्या गरी स्वर्गबाट गंगालाई पृथ्वीमा अवतरण गराएको प्रसंग विभिन्न पुराणमा वर्णन गरिएको छ ।

वैशाख शुक्ल सप्तमीका दिन स्वर्गबाट पृथ्वीमा गंगा अवतरण गराइएकाले यस दिनलाई गंगाेत्पत्ति पर्वका रुपमा मनाउन थालिएको हो । स्वर्गबाट गंगा अवतरण गराउने क्रममा पृथ्वी भासिने डरले महादेवले आफ्नो जटामा थापेको पौराणिक मत रहेको धर्मशास्त्रविद् एवं नेपाल पञ्चांग निर्णायक समितिका पूर्वअध्यक्ष प्रा.डा. रामचन्द्र गौतमले जानकारी दिए । गंगा नदी सागरमा मिसिएपछि यसको नाम गंगासागर हुन्छ ।

राजा भगीरथले ठूलो प्रयत्न गरेर गंगालाई पृथ्वीमा अवतरण गराएकाले भागीरथी नामले पनि गंगालाई पुकारिन्छ । गंगा सप्तमीसँग सम्बन्धित नभए पनि यस दिनलाई बीचमा पारी वैशाख कृष्ण चतुर्दशीदेखि वैशाख शुक्ल पूर्णिमासम्म बागमतीको कटुवाल दहबाट वाग्द्वारसम्म गरिने बागमती तीर्थ यात्रा यसवर्ष पनि स्थगित गरिएको पशुपतिनाथ आगमघरका पुजारी महेश भट्टले बताए ।

आगमघरका मूल पुजारी मदन भट्ट बिरामी परेकाे र उनले नदी किनारका मसानघाटमा गरिने साधनासम्बन्धी दीक्षा अरु कसैलाई नदिएकाले यस वर्ष पनि हाललाई वाग्मती तीर्थयात्रा स्थगित गरिएको पशुपति क्षेत्र विकास कोषले जनाएको छ ।

२०७७ र २०७८ मा पनि कोरोनाबाट बच्न बन्दाबन्दी जारी गरिएकाले वाग्मती तीर्थयात्रा स्थगित गरिएको थियो । नदीको पूजा आराधनाको विधि भने गरिने जनाइएको छ । तीर्थयात्रा स्थगित गरिए पनि वाग्मतीको आराधना एवं पूजा गर्ने विधिलाई भने यथावत् रुपमा निरन्तरता दिइएको उनले बताए ।

वाग्मती जस्तै विभिन्न स्थानमा रहेका नारायणी, गण्डकी, कोशी, कर्णाली, त्रिशूली, इन्द्रावती, सुनकोशीलगायत नदीमा पनि पूजाआराधना गरी गंगा सप्तमी पर्व मनाइन्छ । वैदिक सनातन धर्मावलम्बीले गंगालाई पवित्र तीर्थस्थलका रुपमा पू्जा आराधना गर्छन् ।

हरेक नदी, पोखरी, ताल, तलाउमा रहेको पानीलाई गंगाकै रुपमा मानी प्रत्येक दिन बिहान ‘गङ्गे च यमुने चैव गोदावरी सरस्वती’ मन्त्रले गंगा आदि नदीको प्रार्थनासहित स्नान गर्ने सनातन धर्म शास्त्रीय विधि छ ।

मनाइँदै रवि सप्तमी आइतबार सप्तमी तिथि परेका दिन गरिने भगवान् सूर्यको विशेष पूजा आराधना पनि आज गरिँदैछ । विशेषगरी आइतबारको व्रत बस्नेले मध्याह्नकालमा भगवान् सूर्यको विशेष पूजा आराधना गर्छन् ।

पूजा आराधनापछि सूर्यको १०८ वा १००८ नामको स्तोत्र पाठसमेत गर्ने परम्परा छ । आइतबारको व्रत गर्नेले दिनभर नै नून नखाने व्रतविधि रहेको पनि धर्मशास्त्रविद् गौतमले सुनाए । रवि सप्तमीको योग भने बेला बेलामा परिरहेको हुन्छ ।

प्रकाशित समय : १७:४० बजे

प्रतिक्रिया दिनुहोस्

सम्बन्धित शीर्षकहरु