साताको पहिलो कारोबार दिन सेयर बजारमा दाेहाेराे अंकको गिरावट आएकाे छ । आइतबार धितोपत्र कारोबार मापक नेप्से परिसूचक ३०.८९ अंकले घटेर २५१३.४१ को विन्दुमा ‌ओर्लिएको हाे । परिसूचक दोहोरो अंकले घट्दा कारोबारमा आएका अधिकांश उपसूचक ओरालो लागेका छन् ।

कारोबार रकमको घट्दो क्रमले आइतबार पनि निरन्तरता पायो । गत साताको अन्तिम कारोबार दिन १ अर्ब ८७ करोड रुपैयाँ रहेको खरिदविक्री रकम आइतबारको कारोबारपछि एक अर्ब ४६ करोड रुपैयाँमा खुम्चिएकाे छ । आज एक अर्ब ४६ करोड ७ लाख रुपैयाँ बराबरका ३२ लाख ५३ हजार ८१६ कित्ता सेयर २८ हजार ११३ पटक किनबेच भए ।

आइतबार सर्वाधिक सूर्या लाइफ इन्स्योरेन्सको सेयर ९ करोड ७२ लाख रुपैयाँ बराबरको खरिदविक्री भयाे । सिद्धार्थ इन्स्योरेन्सको पनि ५ करोड एक लाख रुपैयाँको सेयर किनबेच भयो । नबिल बैंक र नेपाल लाइफ इन्स्योरेन्सको ४/४ करोड रुपैयाँ अधिकको सेयर कारोबार भएको नेप्सेले जनाएकाे छ । परिसूचक दोहोरो अंकले घट्दा समेत इमर्जिङ नेपाल, राष्ट्र उत्थान लघुवित्त र नेष्डो समृद्ध लघुवित्तको सेयर मूल्यमा सकारात्मक सर्किट लागेको छ । जलपा सामुदायिक लघुवित्तका लगानीकर्ताले ४.०१ प्रतिशतका हिसाबले कमाए ।

सर्वाधिक गुमाउने युनाइटेड इदी मर्दी आरबी हाइड्रोका लगानीकर्ता हुन् । हाइड्रोको मूल्य प्रतिकित्ता ५.०२ प्रतिशतको दरले घटेको छ ।

प्रकाशित समय : २१:१८ बजे