मकवानपुर जिल्लाको हेटौँडामा भारत सरकारको सहयोगमा निर्माणाधिन नेपाल-भारत मैत्री पोलिटेक्निक प्रतिष्ठानबारे छलफल गर्न परियोजना अनुगमन समितिको दोस्रो बैठक काठमाडौँमा सम्पन्न भएको छ ।

सोमबार भएको बैठकमा भारत सरकार विदेश मन्त्रालयअन्तर्गतको विकास साझेदारी प्रशासन महाशाखाका सह-सचिव सतीश सिवान र नेपाल सरकार शिक्षा, विज्ञान तथा प्रविधि मन्त्रालयका सह-सचिव कमल प्रसाद पोखरेलले सह-अध्यक्षता गरे ।

बैठकमा परियोजनाको समग्र कार्यान्वयन पक्ष र प्रगतिबारे समिक्षा भएको भारतीय दुतावासले जनाएको छ । समितिले परियोजनाका ठेकेदार र परामर्शदातालाई समयमै परियोजना सम्पन्न गर्न निर्देशन दिएको छ ।

कोभिड महामारीका कारण परियोजनाले गति लिन नसकेको उल्लेख गर्दै दुवै पक्षले उक्त परियोजना महामारीले खडा गरेको चुनौति पार गरी अब निर्माणको अन्तिम चरणमा रहेको जनाएको छ । बैठकका क्रममा नेपाली पक्षले नेपालको पूर्वाधार विकासका लागि गरेको निरन्तर सहयोग गरेको प्रति भारत सरकारलाई धन्यवाद दिएको छ ।

भारत पक्षले पनि नेपाल सरकारसँगको फलदायी सहकार्य र नेपालको शिक्षा पूर्वाधारको विकासका लागि भएका संयुक्त प्रयास प्रति खुशी व्यक्त गेका छन् । दुई पक्षबीच परियोजना अनुगमन समितिको अर्को बैठक दुवै पक्षलाई अनुकुल पर्ने मितिमा गर्ने सहमति भएको छ ।

प्रकाशित समय : १७:४० बजे