नेकपा माओवादी केन्द्रका अध्यक्ष पुष्पकमल दाहाल 'प्रचण्ड'ले व्याख्यात्मक घोषणासहितको एमसीसी उचित सम्मानसहित कार्यान्वयनमा नगए पार्टी आन्दोलनमा जाने चेतावनी दिएका छन् । पार्टीको प्रदेश १ स्तरीय भेला तथा प्रशिक्षण कार्यक्रममा सहभागी हुन विराटनगर पुगेका प्रचण्डले सञ्चारकर्मीसँग उनले यस्ताे बताएका हुन् ।

यसका साथै उनले अमेरिकी सहायता परियोजना (एमसीसी) सम्झौता पारित गर्ने सन्दर्भमा पार्टीबाट भएको पूर्वनिर्णय फेल भएमा राजीनामा दिने घोषणा गरेका छन् । आगामी चुनावपछि पार्टीमा एमसीसीबारे छलफल हुने र छलफल पछिको निष्कर्षका क्रममा फेल भएमा राजीनामा दिने प्रचण्डले बताए । एमसीसीबारे पार्टीमा विवाद रहेको र हाललाई एउटा अपिलमार्फत् एउटै भाषा बनाउने र चुनावपछि छलफल हुने प्रचण्डको भनाइ थियो । 'आगामी चुनावपछि पार्टीमा एमसीसीबारे छलफल हुन्छ । फेल भयो भने राजीनामा दिन्छु । ढुक्क हुनुहोला,' उनले भने ।

प्रचण्डले आफ्नै संगठन बलियो बनाएर पार्टी चुनावमा होमिने पनि बताए । तर, गठबन्धनका दलहरुबीच स्थानीय तहको चुनावमा तालमेल भए गठबन्धन बनाएर अगाडि जान सकिने उनकाे भनाइ थियाे ।