प्रमुख प्रतिपक्षी दल नेकपा एमालेको अवरोध निरन्तर जारी रहेपछि बागमती प्रदेशसभाको नवौं अधिवेशन अन्त्यको तयारी गरिएको छ । करिब तीन महिनादेखि एमालेका कारण प्रदेशसभाको बैठक स्थगित हुँदा ऐन निर्माण, संशोधनसहित सर्वसाधारणका समस्याका बारेमा छलफल हुन सकेको छैन ।

चालु आर्थिक वर्षको चार महिना मात्र बाँकी रहेको छ । प्रदेशसभामा अझै हिउँदे अधिवेशन चलिरहेको छ । हिउँदे अधिवेशनलाई कानुन निर्माण गर्ने समयका रूपमा चित्रण गर्ने गरिए पनि बजेट अधिवेशन सञ्चालन गर्नुपर्ने समय भइसकेका छ । त्यसकारण प्रदेश सरकार यस अधिवेशन स्थगित गरेर अगाडि बढ्ने दाउमा पुगेको हो ।

एमालेको अवरोधका कारण २०७८ पुस ८ बाट स्थगित प्रदेशसभा बैठक अझै सुचारु हुन सकेको छैन । आन्तरिक कानुन तथा मामिला मन्त्री तथा सरकारका प्रवक्ता कृष्ण खनालले एमालेको अवरोधका कारण पटकपटक बैठक स्थगित गर्नुपरेको बताए । फागुन १६ मा सहमतिमै बैठक बोलाए पनि सभामुखले किन बैठक स्थगित गरे सरकारलाई थाहा नभएको जानकारी दिए । सहमति भइसकेकाले फागुन २९ को बैठक सञ्चालन हुने मन्त्री खनालको दाबी छ ।

अवरोध कायम रहेमा अधिवेशन अन्त्य गरेर अध्यादेशमार्फत काम गर्नुको विकल्प सरकारसँग नभएको मन्त्री खनालले बताए ।

प्रकाशित समय : १४:०२ बजे