सत्ता गठबन्धनका दलबीच आज निर्णायक छलफल हुने भएको छ । प्रधानमन्त्रीको सचिवालयका अनुसार प्रधानमन्त्री शेरबहादुर देउवा र गठबन्धन दलका शीर्ष नेताहरूबीच आज दिउँसो ३ बजे छलफलका लागि समय तय भएकाे छ । साेही छफलबाट एमसीसीबारे छिनोफानो हुने बताइएकाे छ ।

बुधबारकाे प्रतिनिधि सभा बैठकमा एमसीसी टेबल गर्न जोडबल गरिरहेका प्रधानमन्त्री देउवा गठबन्धनमा रहेका दलहरुले स्वीकार नगर्दा त्यसमा सफल हुन सकेनन् । गठबन्धनको प्रमुख दल नेकपा माओवादी केन्द्रले एमसीसी यथास्थितिमा पास गर्न जबरजस्ती गरे सरकारबाट बाहिरिने निर्णय गरेको थियो भने अर्को दल एकीकृत समाजवादीले कुनै ठोस निर्णय गरेको थिएन । तर संशोधनपछि मात्रै पारित गर्नुपर्ने उसको अडान रहेको थियो ।

पार्टीका अधिकांश नेता तथा कार्यकर्ता एमसीसीको विपक्षमा रहेकाले आफूले एक्लैले निर्णय गर्न नसक्ने प्रचण्डले देउवालाई बताइसकेका छन् । चुनाव नजिकिएको भन्दै उनले एक वर्षपछि सार्ने प्रयास गर्न देउवालाई आग्रह गरेका थिए । तर देउवा प्रचण्डको सो प्रस्तावमा सहमत हुन सकेनन । तत्काल एमसीसी पास गर्नुपर्ने दबाबमा रहेका देउवाले अमेरिकासँगको सम्बन्धमा समस्या आउने र आगामी दिनमा विश्वस्तरबाट आउने अनुदान, सहयोग रोकिने तर्क गरेका थिए ।