एमालेको १०औं राष्ट्रिय महाधिवेशन सुरु हुन मात्र दुई दिन बाँकी रहँदा मंगलबार स्थायी कमिटी बैठक बसेको थियो । जुन ९औं महाधिवेशनबाट निर्वाचित नेकपा एमाले स्थायी कमिटीको अन्तिम बैठक थियो । तुल्सिलाल स्मृति प्रतिष्ठान च्यासलमा बसेको अन्तिम बैठकपछि नेताहरु सामूहिक फोटोसुट गर्दै छुट्टिए ।

१० औं महाधिवेशनको संघारमा रहेको एमालेले मंगलबारको स्थायी कमिटी बैठकबाट पाँच प्रतिशत महाधिवेशन प्रतिनिधि मनोनयन गर्ने निर्णय गरेको थियो । बैठकले १०३ जना मनोनयनका लागि सिफारिस गर्न नाम प्रस्ताव गरेको हो ।

यस्तै अध्यक्ष केपी शर्मा ओलीसहितको ११ सदस्यीय अध्यक्ष मण्डल गठन पनि मंगलबारको बैठकले गरेको छ । बैठकले उपाध्यक्षहरु युवराज ज्ञवाली, अष्टलक्ष्मी शाक्य, भीम रावल र महासचिव ईश्वर पोखरेलसहितको अध्यक्ष मण्डल गठन गरेको छ । त्यस्तै अध्यक्ष मण्डलमा सुवास नेम्वाङ, रामवहादुर थापा बादल, टोपवहादुर रायमाझी, छबिलाल विश्वकर्मा, लालबाबु पण्डित र गोमा देवकाटा पनि छन् ।

मंगलबारको स्थायी कमिटी बैठकले गरेका निर्णय अनुमोदन गर्न पार्टीको केन्द्रिय कमिटीको अन्तिम बैठक चितवनमा गर्ने निर्णय गरिएको छ । अब १०औं महाधिवेशनबाट एमालेको नयाँ पदाधिकारीहरु चयन हुनेछन् ।

प्रकाशित समय : १३:३६ बजे