प्रधानन्यायाधीश चोलेन्द्र शम्शेर राणाको राजीनामा माग्दै आन्दोलनरत नेपाल बार एशोसिएसनले आज राजनीतिक दलका नेताहरूको ध्यानाकर्षण गराउँदैछ । प्रधानन्यायाधीश राणाालाई पदमुक्त गराउन माग गर्दै नेपाल बारले दलका नेताहरूको ध्यानाकर्षण गराउन लागेको हो ।

सर्वोच्च अदालत परिसरमा जारी धर्ना र विरोध कार्यक्रम १२ बजेभित्र सकेर दलका नेताहरूको ध्यानाकर्षण गराउने नेपाल बारको योजना छ । नेपाल बार एशोसिएशनका अध्यक्ष चण्डेश्वर श्रेष्ठका अनुसार सिंहदरबारभित्रको दलकै कार्यालयमा नेताहरूलाई भेटेर ध्यानाकर्षण पत्र बुझाउने योजना रहेको छ । प्रधानन्यायाधीश प्रकरणमा राजनीतिक दलका नेताहरू मौन बसेको भन्दै नेपाल बार असन्तुष्ट छ । बारले प्रधानन्यायाधीशको राजीनामा माग्दै गत कात्तिक १४ गतेदेखि विरोध प्रदर्शन गर्दै आएको छ ।

न्यायालयको निकासबारे मात्र दुई विकल्प छन् । पहिलो, प्रधानन्यायाधीश राणा आफैँ राजी भएर राजीनामा दिने । दोस्रो, दलहरुले महाभियोग लगाएर हटाउने । तर राजनीतिक दलहरुले प्रधानन्यायाधीश राणामाथि अचम्मको सहानभूति दर्शाएका छन् । महाभियोग लगाउने चर्चा चलिरहेकै बेला बरू सरकारले  संसद्को अधिवेशन नै अन्त्य गरिदिएपछि भने दलहरुमाथि आशंका झन बढेको हो ।

सत्तापक्षदेखि प्रमुख प्रतिपक्षसम्मका दलहरुले प्रधानन्यायाधीश राणाको विषय अदालतको आन्तरिक मामिला भन्दै मौनता साँधिरहेका छन् । उनीहरुले राणाका विषयमा अदालतबाटै निकास आउनुपर्ने बताउँदै आएका छन् ।

प्रकाशित समय : १६:२२ बजे