पछिल्लो २४ घण्टामा ८ हजार ७५२ जनामा पीसीआर परीक्षण गर्दा १ हजार ५७७ र ४ हजार ३६५ एन्टिजेन परीक्षणमा ४८८ जनामा कोरोना संक्रमण पुष्टि भएको छ । शुक्रबार देशभर पीसीआर एन्टिजेन गरी २ हजार ६५ जनामा कोरोना संक्रमण पुष्टि भएको स्वास्थ्य तथा जनसंख्या मन्त्रालयले जनाएको छ ।

यससँगै देशभर कोरोना संक्रमितको कुल संख्या पीसीआरबाट भएको परीक्षणमा ७ लाख ५६ हजार ४९२ पुगेको छ भने एन्टिजेन विधिबाट गरिएको परीक्षणमा ८२ हजार ४५६ पुगेको छ । शुक्रबार कोरोना संक्रमणबाट २५ जनाले ज्यान गुमाएका छन् । मन्त्रालयका अनुसार हालसम्म कोरोनाबाट १० हजार ६६३ जनाले ज्यान गुमाइसकेका छन् । पछिल्लो २४ घण्टामा कोरोना संक्रमणमुक्त हुनेको संख्या २ हजार ३३७ जना रहेको छ । यससँगै हालसम्म कोरोना निको हुनेको संख्या ७ लाख ८ हजार २३० जना पुगेको छ ।

हाल देशभर ३७ हजार ५९९ सक्रिय संक्रमित रहेको मन्त्रालयले जनाएको छ । जसमध्ये ३४ हजार ६७६ जना होम आइसोलेसनमा रहेका छन् भने २ हजार ९२३ जना संस्थागत आइसोलेसनमा रहेका छन् । कोरोनाका बिरामीमध्ये ६२२ जना आईसीयू र १७१ जना भेन्टिलेटरमा उपचाररत् छन् ।