महिला लघुवित्त वित्तीय संस्थाको आईपीओ बाँडफाँड भएको छ । बिक्री प्रबन्धक नेपाल एसबीआई मर्चेन्ट बैंकिङले शुक्रबार बिहान कम्पनीको कार्यालयमा सेयर बाँडफाँड गरेको हो ।

आवेदकमध्ये ३७ हजार ५ सय जनाले प्रतिव्यक्ति १० कित्ताका दरले आईपीओ पाएका छन् । लघुवित्तको आईपीओमा १५ लाख ४० हजार ३५ जना आवेदकले २ करोड ३७ लाख ४७ हजार ५९० कित्ता सेयरका लागि आवेदन दिएका थिए ।

मागभन्दा धेरै आवेदन परेकाले धितोपत्र निष्कासन तथा बाँडफाँड निर्देशिकाअनुसार गोलाप्रथाबाट न्यूनतम् १० कित्ताका दरले सेयर वितरण गरिएको एसबीआई क्यापिटलले जनाएको छ ।

लघुवित्तले चुक्ता पुँजी १० करोड रुपैयाँको ४० प्रतिशतले हुन आउने ४ करोड रुपैयाँबराबरको प्रतिकित्ता १०० अंकित दरको ४ लाख कित्ता साधारण सेयर निष्कासन गरेको थियो । जसमध्ये ०.५ प्रतिशत अर्थात् ५ हजार कित्ता सेयर कर्मचारीका लागि छुट्याइएको छ । सर्वसाधारणका लागि छुट्याइएकोमध्ये ५ प्रतिशत अर्थात् २० हजार कित्ता सेयर सामूहिक लगानी कोषका लागि छुट्याइएको छ । सर्वसाधारणले ३ लाख ७५ हजार कित्ताका लागि आवेदन दिएका थिए ।

आईपीओको नतिजा बिक्री प्रबन्धक नेपाल एसबीआई मर्चेन्ट बैंकिङ र कम्पनीको वेबसाइटबाट पनि हेर्न मिल्ने व्यवस्था गर्न सीडीएस एन्ड क्लियरिङले निर्देशन दिए पनि दुवै वेबसाइट खुलेका छैनन् ।

यो पनि पढ्नुहोस्

लगानीकर्ताको डिम्याट अकाउन्ट जथाभावी बाँड्न सीडीएससीले लगायो रोक

प्रकाशित समय : १७:३५ बजे