ज्योति लाइफ इन्स्योरेन्सले फागुन २३ गतेदेखि सर्वसाधारण सेयर (आईपीओ) निष्कासन गर्ने भएको छ । कम्पनीले ६६ करोड रुपैयाँ बराबरको ६६ लाख कित्ता आईपीओ जारी गर्न हालै धितोपत्र बोर्डबाट स्वीकृति पाएको थियो ।

निष्कासन गर्न लागिएको ६६ लाख कित्तामध्ये ५ प्रतिशत अर्थात् ३ लाख ३३ हजार कित्ता कर्मचारी र ५ प्रतिशत सामूहिक लागनी कोषका लागि सुरक्षित गरिएको छ । सर्वसाधारणले ५९ लाख ४० हजार कित्ता सेयरका लागि आवेदन दिन सक्नेछन् ।

लगानीकर्ताले न्यूनतम १० कित्तादेखि ६६ हजार कित्तासम्मका लागि आवेदन दिन सक्ने निष्कासन तथा बिक्री प्रबन्धक एनएमबी क्यापिटलले जनाएको छ । आईपीओका लागि सि–आस्वा सदस्य बैंक तथा वित्तीय संस्था र मेरो सेयरमार्फत आवेदन दिन सकिन्छ ।

ज्योति लाइफको आईपीओलाई केयर रेटिङ नेपालले केयर एनपी त्रिपल बी इस्यूअर रेटिङ प्रदान गरेको छ । यसले समयमै वित्तीय दायित्व पूरा गर्न सक्ने सम्बन्धमा मध्यम रूपमा सुरक्षित रहेको संकेत गर्छ ।

हाल कम्पनीको चुक्ता पुँजी एक अर्ब ५४ करोड रुपैयाँ छ । आईपीओ बाँडफाँडपश्चात् चुक्ता पुँजी २ अर्ब २० करोड रुपैयाँ पुग्नेछ ।

यो पनि पढ्नुहोस्

आईपीओ जारी गर्ने तरखरमा ज्योति लाइफ, यस्ता छन् वित्तीय सूचक

प्रकाशित समय : १७:४२ बजे