प्रहरी अधिकारीहरुलाई झुक्याउँदै अमेरिका प्रवेश गर्ने क्रममा अवैध आप्रवासी सवार भ्यान दुर्घटना हुँदा पाँचजनाको मृत्यु भएको छ । अमेरिकी नागरिककै सहयोगमा १२ जना आप्रवासीलाई अमेरिका प्रवेश गराइरहेका बेला मेक्सिकोको सीमानजिकै टेक्सासमा भ्यान दुर्घटना भएको हो । दुर्घटनामा अन्य सातजना घाइते भएका छन् । मृत्यु हुनेहरुको सनाखत भइसकेको छैन ।
प्रहरीले पिछा गरेपछि भाग्ने क्रममा तीव्र गतिमा गुडाइएको भ्यान अनियन्त्रित भएर दुर्घटना भएको स्थानीय प्रशासनले जनाएको छ । केही समययता मेक्सिकोबाट अवैध ढंगले आप्रवासीहरु अमेरिका भित्रिने क्रम बढेको भन्दै टेक्सासका अधिकारीले अमेरिका–मेक्सिको सीमामा पर्खाल लगाउन अनिवार्य भएको बताएका छन् । अधिकारीहरुले आप्रवासी भित्र्याउन सहयोग गर्ने अमेरिकीहरुमाथि पनि निगरानी बढाएको बताइएको छ ।

प्रकाशित समय : ००:०२ बजे