पर्वतारोही कामिरिता शेर्पाको ‘सगरमाथा कथा यात्रा २०१९’ लार्इ वृज सिमेन्ट इन्डस्ट्रिजले सहयोग गर्ने भएको छ । विश्वको सर्वोच्च शिखर सगरमाथाको २२औं पटक सफल आरोहण गरी विश्व कीर्तिमान कायम राख्न सफल शेर्पालाई कथा यात्रामा वृज सिमेन्ट र पुष्पतारा केडिया फाउन्डेसनले सहयोग गर्ने भएका हुन् ।

शेर्पाले सन् २०१९ मा ‘सगरमाथा कथा यात्रा २०१९’ आयोजना गर्दै छन् । अभियानअन्तर्गत शेर्पाले सगरमाथावरिपरिका बस्तीको यात्रा गरी हिमाली भेगका कथा संकलन गर्नेछन् । सगरमाथावरिपरिका बस्ती र विशेषगरी शेर्पा समुदायको सांस्कृतिक, आर्थिक, सामाजिक तथा मौलिक कथालार्इ विश्वसामु चिनाउनु कथा यात्राको मुख्य उद्देश्य रहनेछ । कथा यात्रामा सगरमाथा क्षेत्रको फोहोर तथा जलवायु परिवर्तनले स्थानीय बस्ती तथा पर्यटन व्यवसायमा परिरहेको नकारात्मक प्रभाव पनि समेटिनेछ । त्यस्तै, २०७२ साल वैशाख १२ गतेको विनासकारी भूकम्पपछिका पुनर्निर्माणका कथा पनि अभियानमा समेटिनेछ ।

कथा संकलनका लागि आधुनिक प्रविधिको प्रयोग गरिनुको साथै नक्सामा कथा राख्ने स्ट्रिट भ्यु अभियान थालनी गरिनेछ, जसका लागि स्टोरी साइकलसँग सहकार्य भएको कम्पनीले जनाएको छ । आरोही शेर्पा वृज सिमेन्टद्वारा उत्पादित वृज सुपर प्रिमियम ओपीसी सिमेन्टको ब्रान्ड एम्बेस्डर पनि हुन् ।

कार्यक्रममा पुष्पतारा केडियाका अध्यक्ष एवं वृज सिमेन्टका प्रबन्ध निर्देशक मनोजकुमार केडियाले शेर्पालाई बधाई दिँदै नेपालको विकास र समृद्धिका साथै सामाजिक उत्तरदायित्वका कार्यमा सधैं सहयोग गर्न केडिया अर्गनाइजेसन तत्पर रहेको बताए ।