सभामुख कृष्णबहादुर महराले उपल्लो मुस्ताङको स्याङ्बोचेमा सडक निर्माणमा कार्यरत मजदुर चढेको टिपर दुर्घटनाप्रति दुःख व्यक्त गरेका छन् । शनिबार एक शोक वक्तव्य जारी गरी सभामुख महराले उक्त दुर्घटनामा परी रोल्पाका नौं जना, दाङका छ जना र स्याङ्जा, कैलाली, धादिङ, ओखलढुंगा, कपिलवस्तुका एक-एक जना गरी २० जना मजदुरको दुःखद् निधन भएको खबरले आफूलाई मर्माहत बनाएको उल्लेख गरेका छन् ।

दुर्घटनामा परी निधन भएका मजदुरप्रति श्रद्धाञ्जलि तथा शोकाकुल परिवारजनमा गहिरो समवेदना व्यक्त गर्दै सभामुख महराले घाइतेको शीघ्र स्वास्थ्यलाभको कामना गरेका छन् । दुर्घटनाका घाइतेहरुको उपचारमा कुनै कमी हुन नदिन उनले सरकारसँग आग्रह समेत गरेका छन् ।

सभामुख महराले दुर्घटनामा निधन भएका मजदुरको शव घरसम्म पुर्याउन र उचित क्षतिपूर्ति उपलब्ध गराई पीडित परिवारलाई राहत प्रदानमा ढिलाइ नगर्न सम्बन्धित पक्षसँग अनुरोध गरेका छन् ।

(रासस)

प्रकाशित समय : ०३:५९ बजे