लमजुङमा निर्माणाधीन २७ मेगावाटको दोर्दी खोला जलविद्युत आयोजनाले ७० प्रतिशत काम सम्पन्न गरेको छ । बाँध, सुरुङ र विद्युतगृहको काम एकसाथ अघि बढेकाले अर्को वर्ष विद्युत उत्पादन हुने आयोजनाले जनाएको छ ।

आयोजनाको बाँधमा ८० प्रतिशत काम सम्पन्न भएको हिमालयन पावर पार्टनर कम्पनीले जानकारी गराएको छ । त्यस्तै, मुख्य सुरुङको निर्माणले पनि गति लिएको छ । आयोजनाका अनुसार २ हजार ६ सय ६२ मिटर लामो सुरुङमध्ये १ हजार ६ सय मिटर पूरा भएको छ ।

कमजोर भौगोलिक अवस्थाका कारण मुख्य सुरुङको काम लामो समय प्रभावित भए पनि ठेकेदार परिवर्तन गरेपछि अहिले कामले गति लिएको हो । इको इन्फ्रा व्युल्डर्सले सुरुङको काम अघि बढाउन नसकेपछि ठेक्का तोडेर मल्टी इन्फ्रास्ट्रक्चर डेभलपमेन्ट कम्पनीलाई दिइएको थियो ।

विद्युतगृहको संरचना निर्माणको काम पूरा गरेर पुसबाट इलेक्ट्रो मेकानिकल उपकरण जडानको काम सुरु गरिनेछ । आयोजनाबाट २०७६ भदौबाट विद्युत उत्पादन गर्ने लक्ष्य लिइएको छ । यसअघि, २०७५ चैतबाट विद्युत उत्पादन गर्ने तालिका भए पनि विभिन्न कारणले ६ महिना ढिलो भएको कम्पनीले जनाएको छ ।

उत्पादित बिजुली प्राधिकरणको उदिपुर सबस्टेसनमा लगेर जोडिनेछ । आयोजनाको अनुमानित लागत ४ अर्ब २३ करोड रुपैयाँ हो । आयोजनामा प्राइम कमर्सियल बैंकको अगुवाइमा ८ बैंकले ३ अर्ब १७ करोड रुपैयाँ लगानी गरेका छन् । एक अर्ब ६ करोड रुपैयाँ स्वपुँजी लगानी छ ।

प्रकाशित समय : १८:५० बजे