हरितालिका तीज पर्व सुरु,आज दर खाने दिन
वि.सं.२०७५ भदौ २६ मंगलवार १४:०७
shares

हरितालिका अघिल्लो दिन अर्थात् दर खाने दिन । तीजको पहिलो दिन लाई दर खाने दिन भनिन्छ । तीजको व्रत बस्न शक्ति प्राप्तिका लागि आज नेपाली नारीहरुले दर खाँदै छन् । विवाहित महिलाले पतिको दीर्घायुको कामना तथा अविवाहितहरूले सुयोग्य पतिको माग गर्दै भोली पल्ट निराहार व्रत बस्ने उद्देश्यले यो दिन घरघरमा मिष्ठान्न परिकार तयार गरी दर खाने चलन छ ।
महिलाहरू यो दिन माछामासु वाहेक चोखो चिज खाएर भोलि पल्ट निराहर व्रत बस्ने गर्दछन् । दरमा खिर, ढकने र सेलरोटी खाने गरिन्छ । स्थान अनुसार दरखाने परिकारहरू फरक फरक छन् । आधुनिकतासँगै दर खाने परिकारहरूमा पनि फरक आउन थालेको छ । तीजमा माइतीले छोरीरचेलीलाई घरमा बोलाएर मीठामीठा परिकार ख्वाउने चलन छ ।
पछिल्लो समय तीजको दर खाने नाममा एक महिना पहिलेदेखि भोजभतेर गर्ने गरिएको छ । एक महिना अघिदेखि दर खाने चलन संस्कृतिका नाममा विकृति भएको संस्कृतिविद्हरु बताउँछन् ।
परापूर्वकालमा देवी पार्वतीले शीवलाई पतिको रुपमा पाउन निराहार ब्रत बसेको र कामना पुरा भएको विश्वासका आधारमा राम्रो पति पाउन र विवाहिताहरुले पतिको सुस्वास्थ्य, दीर्घायु र प्रगतिको कामना गर्दै भोली ब्रत बस्ने चलन रहेको छ ।

























