बहुक्षेत्रीय प्राविधिक तथा आर्थिक विकासका लागि बंगालका खाडीको प्रयास (बिम्स्टेक)को चाथौ शिखर सम्मेलन पूर्वमिस नेपालको ग्यामरस आवाजबाट सुरु भएको छ । काठमाडौंको होटल सोल्टिमा बिहीबार अपराह्न सुरु सम्मेलनको उद्घाटन समारोहको उद्घोषिका सुब्बा छिन् ।

सुब्बा सामाजिक कार्यकर्ता तथा उद्यमीसमेत हुन् । उनले आमसञ्चार र पत्रकारिता तथा अभिनय विषयमा स्नातकोत्तर उत्तीर्ण गरेकी छन् । नेपालको लिम्बू समुदायकी सुब्बालाई सरकारले बिमस्टेक शिखर सम्मेलनको उद्घोषिका बनाएर सकारात्मक सुरुवातको सन्देश दिन खोजेको छ ।

माल्भिकाले २१ वर्षको उमेरमा मिस नेपाल २००२ को उपाधी जितेकी थिइन् । त्यसपछि उनले कान्तिपुर टेलिभिजनसँग आवद्ध भएर ‘कल कान्तिपुर’ नामक कार्यक्रमकी प्रस्तोता भएर काम गरिन् । सन् २००८ मा, उनले भारतको भ्वाइस अफ इन्डिया, एमटिभी एक्जिटमा मानव तस्करीको विषयमा दूत भएर कार्य गरेकी थिईन् ।

सम्मेलनको पहिलो वक्ता प्रधानमन्त्री केपी शर्मा ओलीले सुरुमा सम्बोधन गरेका छन् । सम्मेलन आयोजक राष्ट्र र अध्यक्षको हैसियतमा उनले कार्यक्रम उद्घाटन गरेका हुन् । सम्बोधनको सुरुमा ओलीले अरु राष्ट्रका प्रमुखलाई नेपाली भाषमै सम्बोधन गर्दै स्वागत गरे । त्यसपछि उनले अंग्रेजी भाषामा सम्बोधन गरिरहेका छन् ।