विकासशील राष्ट्रका बिमा तथा पुनर्बिमा कम्पनीहरुको संगठन (एआईआरडिसी) को अध्यक्षमा विजयबहादुर शाह चयन भएका छन् । संगठनको मंगलबार नेपालमा भएको वार्षिक साधारणसभाले नेपाल इन्स्योरेन्स कम्पनीका प्रमुख कार्यकारी अधिकृत शाहको नेतृत्वमा नौ सदस्यीय कार्यसमिति निर्विरोध चयन गरेको हो ।

नवनिर्वाचित कार्यसमितिको उपाध्यक्षमा घानाकी एलिजवेथ बान्स डोग्वे चयन भएकी छन् । महासचिवमा फिलिपिन्सकी हर्मिनला जासिन्टो र सदस्यहरुमा फिलिपिन्सका इस्थर सि टान, श्रीलंकका डा. जागथ आलविस, बहराइनका यासिर अल्वाहर्न, तान्जेनियका विल्सन नाथानिएल डेसान्जो चयन भएका छन् । समितिमा जिम्बाबे र थाइल्यान्डका प्रतिनिधि पनि चयन भएका छन् ।

नयाँ समितिको कार्यकाल दुई वर्ष रहनेछ । साधारण सभाले २२औं एआईआरडिसी सम्मेलन सन् २०२० केन्यामा गर्ने निर्णय गरेको छ ।

सम्मेलनमा ८८ मुलुकका प्रतिनिधिसहित १८ मुलुकका बिमा तथा पुनर्बिमा कम्पनीका चार सय जनाको सहभागिता थियो । सम्मेलन बुधबारसम्म चल्नेछ ।

प्रकाशित समय : १२:३१ बजे