नेपाल कम्युनिस्ट पार्टी (नेकपा)का सांसद महेश बस्नेतले संसदमा सांसदहरुको अभिव्यक्ति व्यक्तित्व र गरिमा सुहाउँदो नभएको टिप्पणी गरेका हुन् । बस्नेतले संसदमा सांसदहरुले तथ्यलाई ‘ट्विस्ट’ गरेर बोल्ने गरेको भन्दै साही विषयमा आउने समाचारलाई पुनः संसदमा प्रस्तुत गरिएको गुनासो गरे । उनले विशेष र शुन्य समायमा बोल्ने सांसदहरुको अभिव्यक्ति चुनाव तयारीताकाको भाषण जस्तो भएको टिप्पणी गरे ।

बस्नेतले सांसदहरुले तथ्य र प्रमाणविना बोल्न नहुने बताए । ‘तथ्यलाई ट्विस्ट गरेर माननीयहरु बोल्ने र ती कुराहरु अर्काे दिनका समाचार यहाँ आएर भन्ने गर्दा सदनको गरिमामाथिनै प्रश्न उठेको छ ।’

मुलुकी फौजदारी तथा देवानी संहिताका प्रावधानलाई लिएर सरकारको आलोचना भइरहेको बेला बस्नेतले त्यसको बचाउ गरे । उनले उक्त संहिता वर्तमान प्रधानमन्त्री केपी शर्मा ओलीका पालामा नभई शेरबहादुर देउवा प्रधानमन्त्री भएको बेला पारित भएको उल्लेख गरे ।

‘नमुना संविधान ल्याएका छौं र प्रस्तावनामै पूर्ण प्रेस स्वतन्त्रताको ग्यारेण्टी गरेका छौ’, उनले भने, ‘तर राजनीतिकरण गर्ने हिसावले प्रधानमन्त्री र गृहमन्त्रीलाई प्रश्न उठाउने गरिएको छ । यो संहिता अहिले होइन पूर्वप्रधानमन्त्री शेरबहादुर देउवाको पालामा नै पारित भएको हो । एक वर्षपछि भदौ १ गतेबाट संहिता कार्यान्वयन मात्रै भएको हो ।’

संहिताले चिकित्सकहरुको गरिमा र सम्मानलाई संहिताले आँच नपुर्याउने उनको जिकिर थियो । तर, उपचारमा लापरबाही गर्नेहरुलाई कारबाही गर्न कानुन आवश्यक भएको उनले बताए । ‘एउटा खुट्टाको अप्रेशन गर्ने ठाउँमा अर्को खुट्टाको र एउटा किड्नीको अप्रेशन गर्न थाल्दा अर्को किड्नीको अप्रेशन गर्ने जस्ता लापर्वाही नहोस् भनेर यो आएको जस्तो लाग्छ,’ बस्नेतले भने ।

प्रधानमन्त्रीको राजिनामा माग गरिएको विषयप्रति असहमति जनाउदै बस्नेतले त्यसलाई ‘हास्यास्पद’ भने । अध्यागमन विभागले एक व्यक्तिलाई विदेश जान रोकेकाले प्रधानमन्त्रीको राजिनामा माग्नु हास्यास्पद भएको उनको भनाई थियो ।