केही दिनयता धनुषालगायत तराई मधेसमा बढेको प्रचण्ड गर्मीका कारण स्कुले बालबालिकाहरु समस्या परेका छन् । भदौ महिनामा प्रचण्ड गर्मीका कारण विद्यालयहरुमा विद्यार्थीहरुको उपस्थिती कम देखिएको छ ।

धनुषाको नगराइन नगरपालिकाको फुलगामाबजारमै अवस्थित श्री राष्ट्रिय आधारभुत विद्यालयमा कक्षा ५ सम्म पढाई हुँदै आएको छ । विद्यालयमा करिब दुई सय पचासभन्दा बढी विद्यार्थीहरु अध्ययनरत छन । तर हाल विद्यालयमा विद्यार्थी संख्याको आधा मात्रै विद्यालय आउने गरेको विद्यालयका शिक्षक धनिराम ठाकुरले बताए ।

विद्यालयमा विद्यार्थीहरुको चापअनुसारको कक्षाकोठामा फर्निचर अभावले गर्दा विद्यार्थीहरुलाई खुल्ला भुइँमै बसाएर पढाउनु परेको विद्यालयका प्रध्यानाध्यापक रामनारायण पंजियारले जानकारी दिए ।

विद्यालयमा कक्षाकोठाको अवस्था विद्यार्थी संख्याको अनुपातमा नभएको र हावादार समेत नरहेकाले समस्या भएको पंजियारले बताए । विद्यार्थीहरुलाई एक त भुइँमा बसेर पढ्नु परेको छ भने अर्कातर्फ चारैतिर चारैतिर टाँसिएरै घर बनाएकाले विद्यालयको कक्षाकोठा अध्यारो भएको प्र.अ. पंजियारले बताए । विद्यालयको भवन समेत वर्षौं पहिले बनाएकाले गर्दा जस्तापाताले छाएको छ भुई र छानाको दुरी कम भएकाले विद्यार्थीहरुलाई गर्मीले बढी सताउने गरेको छ । विद्यार्थी मात्र होइन गर्मीले शिक्षकलाईसमेत आहत बनाएको छ ।

गर्मीले गर्दा शरीर पसिनै पसिनाले भिजेर विद्यार्थीहरुको कापी चेक गर्दा पसिनाले कापी नै भिजेर च्यातिने गरेको पंजियारले बताए । विद्यालयमा खानेपानी र चर्पीकोसमेत राम्रो व्यवस्था नरहेकाले विद्यार्थीहरुलाई दिसा पिसाव गर्नमै समस्या भएको छ । त्यतिमात्र होइन तिर्खा लाग्दा पानी खान पनि आफ्नो घर नै जानुपर्ने बाध्यता रहेको विद्यार्थीहरुले गुनासो गरेका छन् ।

यता, नगराइन नगरपालिकाकै घोडघासस्थित श्री मिथिला राष्ट्रिय प्राथमिक विद्यालयमा २ सय २५ विद्यार्थी अध्ययनरत छन् । तर, विद्यालयमा हाल मुस्किलले ५० विद्यार्थी उपस्थित हुने गरेका छन् । मंगलबार विद्यालयमा कक्षा ४ मा ४ जना र कक्षा ५ मा ६ जना, कक्षा ३ मा ७ जना, कक्षा २ मा १० जना विद्यार्थी उपस्थित भएका थिए । विद्यालयको पुरानो भवन र कक्षाकोठा अभावले गर्दा विद्यार्थीहरुलाई पढाई लेखाई गराउन निकै समस्या हुँदै आएको विद्यालयका प्रध्यानाध्यापक आशा झाले बताइन् ।

प्र.अ. झाले भनिन् विद्यालयको कक्षाकोठा हावादार छैनन् साघुरो कक्षाकोठामा पढाउनु परेकाले विद्यार्थीहरुलाई पढाउन निकै समस्या भइरहेको छ । गर्मीकै कारण गर्दा भदौ ३ गते आफूहरुले टिफिनकै समयमा विद्यालय व्यवस्थापन समितिको राय लिएर विदा दिएको बताएकी छिन् ।

विद्यालयहरुमा जस्तापाता (टिन)को छाना भएको भवन बनाइनु तराई मधेशको लागि सान्दर्भिक नभएको नगराइन नगरपालिकाकै श्री अखिलेश्वरनाथ राष्ट्रिय प्राथमिक विद्यालयका शिक्षक रामसरोज यादव तर्क गर्छन् । शिक्षक यादवले भने तराइ मधेसमा गर्मीको ६ महिना जस्तापाता तातिएर विद्यार्थीहरुलाई कक्षाकोठामा बस्न कठिन भइरहेको छ ।

विद्यालयमा बिजुलीवत्तीको सुविधा उपलब्ध हुन सकेको छैन भने पुस महिनामा जस्तापाताबाट असिना चुहिने गर्दछ । त्यस्तै वर्षायाममा पानीको थोपाले गर्दा आवाज निस्किने भएकाले शिक्षकहरुलाई समेत निकै समस्या भोग्नु परेकाले अब भवन बनाउदा जस्तापाताको विकल्प खोज्नुपर्ने बताएका छन् ।

श्री मिथिला आधारभुत विद्यालयका विद्यालय व्यवस्थापन समितिका अध्यक्ष सुरेन्द्र पासमानका अनुसार गर्मी यामको समयमा विद्यालयमा विजुलीवतीको सुविधा भएको खण्डमा पंखा लगाउन सकिन्छ । तर कतिपय विद्यालयहरु गाउँभन्दा टाढा रहेकाले विजुली पुर्याउन नसकेकाले विद्यार्थीहरुलाई समस्या भइरेको छ । सोही कारण जस्तापाताको विकल्पमा माटोले बनेको खपडा (छाना) लगाउनुपर्ने उनको तर्क छ ।

धनुषाको सवैला नगरपालिकाको रघुनाथपुर बस्ने अभिभावकसमेत रहेका समाजसेवी विनोद साह विद्यालयको वरिपरी हराभरा राख्नु पर्ने गरि वृक्षारोपण गर्न सके प्रचण्ड गर्मीका बेलामा केही मात्रामा भएपनि चिसोपना महसुस हुने बताउँछन ।

यता, प्रचण्ड गर्मीको समयमा धनुषाका अधिकांश विद्यालयमा विजुलीवत्तीको सुविधा नभएको र कक्षाकोठासमेत अवस्थित देखिएकोले विहानी कक्षा सञ्चालनको बारेमा पनि सोच्न थालिएको छ । स्थानिय तहको समन्वयमा विहानी कक्षा संचालन गर्न सकिने मौखिक निर्देशन भदौको पहिलो हप्तामै गरिसकेको शिक्षा विकास तथा समन्वय इकाइ धनुषाका निमित्त प्रमुख मेहिलाल यादवले बताए ।

विद्यालयमा विद्यार्थी र शिक्षकहरुसमेत गर्मीले गर्दा अध्ययन अध्यापन गराउनमा समस्या भई रहेको अनुभव सुनाउछन् । स्थानिय तहकै शिक्षाका स्रोत व्यक्ति र विद्यालय निरिक्षकहरुले जानकारी गराएकाले गर्दा स्थानिय तहकै समन्वयमा विहानी कक्षा संचालन गर्न विद्यालयहरुलाई छुट दिएको निमित्त प्रमुख यादवले बताएका छन ।

सबै तस्बिरहरू- दीपेन्द्रप्रसाद सिंह/न्युज काराेबार

प्रकाशित समय : २०:१९ बजे