रोजगारदाता कम्पनीहरू सामाजिक सुरक्षा कोषमा सूचीकृत हुन थालेका छन् । सामाजिक सुरक्षा योजनाअन्तर्गत झण्डै दुई सयभन्दा बढी कम्पनी कोषमा सूचीकृत भइसकेका हुन् ।

कोषमा सूचीकृत हुन सामाजिक सुरक्षा कोषले गएको कार्तिक २६ मा सूचना प्रकाशित गरेको थियो । यससँगै कम्पनीहरू सामाजिक सुरक्षा कोषमा सूचीकृत हुन थालेका कोषका कार्यकारी निर्देशक श्यामराज अधिकारीले जानकारी दिए । ‘मंसिर ६ गतेदेखि कोषमा सूचीकृत गरिन थालिएको छ, काठमाडौं उपत्यकाका निजी कम्पनीहरुको आवेदन अनुसार सूचीकृत गर्ने काम भईरहेको छ ।’

तीन महिनाभित्र उपत्यकाका सबै कम्पनी कोषमा सूचीकृत भइसक्ने उनले बताए । आउँदो आर्थिक बर्षसम्ममा सबै कम्पनीमा आबद्ध श्रमिकलाई पनि कोषमा अनिवार्य सूचीकृत गराउनु पर्ने अधिकारीले जानकारी दिए । उनले भने ‘फागुन ६ गतेभित्र काठमाडौं उपत्यकाका सबै रोजगारदाता कम्पनीले कोषमा सूचीकृत हुनु पर्ने समय तोकेका छौ ।’

यस्तो छ कोषमा दर्ता प्रक्रिया

सबै रोजगारदाता कम्पनीले श्रम ऐन अन्तर्गत रहेर सामाजिक सुरक्षा कोषमा अननिवार्य दर्ता हुनै पर्ने नियम छ । रोजगारदाता कम्पनी कोषमा सूचीकृत भइसकेपछि कम्पनीले कोषबाट सूचीकृत भइसकेको प्रमाण पत्र र दर्ता नम्बर पाउने छ । त्यसको तीन महीनाभित्र कम्पनीले आफ्नो श्रमिकलाई पनि कोषमा सूचीकृत गारउनु पर्नेछ ।

सम्बन्धित कम्पनीबाट श्रमिक सूचीकृत भएपछि कम्पनी र श्रमिकको स्किम अनुसार कोषमा योगदानको रकम जम्मा गर्नका लागि कोषले फेरि सूचना प्रकाशित गर्ने छ । त्यसपछि श्रमिकको पारिश्रमिकबाट तलबको ११ प्रतिशत कोषमा जम्मा गरिने छ ।  त्यसमा सम्बन्धित कम्पनीले २० रकम थप गरिदिनुपर्ने छ ।

यसरी जम्मा भएको ३१ प्रतिशत रकम मासिक रूपमा कोषमा जम्मा गरिने र भविष्यमा त्यसैबाट पेन्सन तथा त्यसअघि बीमासहितका विभिन्न सुविधा उपलब्ध उपलब्ध गराइने योगदानमा आधारित सामाजिक सुरक्षा ऐन तथा कायविधिमा उल्लेख छ । यो कार्यक्रम कार्यान्वयनमा आएपछि निजी क्षेत्रमा कार्यरत श्रमिकले आफ्नो योगदानको आधारमा पेन्सन पाउने छन् ।