नेपाली कांग्रेसका नेता तथा पूर्वमन्त्री चक्रप्रसाद बास्तोलाको निधन भएको छ । विगत ६ वर्षदेखि सिकिस्त रहेका बास्तोलाको शनिबार राति १०:२० बजे निधन भएको हो ।

वि.सं. २०६९ पुस १४ गते मोरङमा कुलपूजामा भाग लिने क्रमा लढेका बास्तोला त्यसयता सिकिस्त थिए । उनलाई मस्तिस्कघाट (ब्रेन ह्यामरेज) भएको थियो । नेपालको प्रजातान्त्रिक प्रजातान्त्रिक आन्दोलनमा नेता बास्तोलाको ठूलो योगदान रहेको नेताहरुले बताएका छन् ।

पूर्वमन्त्री र भारतका लागि नेपाली राजदूतसमेत भएका बास्तोला दूरगामी नेताका रुपमा परिचित थिए । उनी दरबार हत्याकाण्ड हुँदा परराष्ट्रमन्त्री थिए । बास्तोलाका श्रीमति र दुई छोरी छन् ।

अचेत अवस्थामा रहेका बास्तोलालाई शनिबार विहान परिवारले उपचारका लागि न्युरो अस्पताल बाँसबारी लगेको थियो । शनिबारै अस्पतालले बास्तोलाको क्लिनिकल्ली डेथ भएको भन्दै घर पठाएको थियो ।

घरमै लढेर मस्तिस्कघात भएका बास्तोलालाई भारतको मेदान्त अस्पताल लगेर तीन महिनासम्म उपचार गराइएको थियो । तर, उनको अवस्थामा सुधार नभएपछि काठमाडौं ल्याइएको थियो । काठमाडौंमा पनि उपचार सम्भव नभएपछि २०७० कात्तिकदेखि घरमै उपचार भइरहेको थियो । घरमा रहँदा पनि उनलाई आसियु बेडमै आराम गराइएको थियो ।

विपीको प्रेरणाले राजनीतिमा होमीएका बास्तोलाको नाम वि.सं. २०३० को बहुचर्चित विमान अपहरण काण्डमा नाम मुछिएपछि चर्चित बनेका थिए ।