पछिल्लो समय महिलामाथि बढ्दै गएको यौनजन्य हिंसाबाट जोगिन प्रदेशस्तरीय आत्मरक्षा तालीम अभियानका रुपमा अघि बढाइएको छ । विभिन्न विद्यालयमा सञ्चालन भइरहेको आत्मरक्षा तालीम सोमबारदेखि पोखराको टुँडिखेलस्थित राष्ट्रिय माविमा शुरु भएको छ ।

इम्पावर ओमेन एण्ड चिल्ड्रेन नेपाल (इवाच)को समन्वयमा भएको तालीममा गण्डकी प्रदेशका सांसद रामजी बरालले सामाजिक विकृति र विसङ्गति विरुद्ध लड्न आत्मबल जरुरी रहेको बताए । उनले भने, ‘कुनै व्यक्ति सफल हुन सही विचार, साहस र विधिको प्रयोगले मात्र सम्भव हुन्छ ।’

पोखरा महानगरपालिका–१ का वडाध्यक्ष शारदाकुमारी पराजुलीले इच्छा शक्ति भएमा मात्र आत्मविश्वास र आत्मबल बढ्ने बताए । विद्यालयका प्रधानाध्यापक वेदप्रसाद वस्तीले समस्या देखेर भाग्ने होइन आफ्नो सुरक्षा गर्न सक्ने क्षमताको विकास गर्न विद्यालयमा तालीमको आयोजना गरिएको जानकारी दिए ।

तीन दिनसम्म चल्ने सो तालीममा तेक्वान्दो खेलाडी जीवन खातीले प्रशिक्षण दिनेछिन् । प्रशिक्षणमा आकस्मिकरुपमा कसैबाट हुनसक्ने आक्रमणबाट कसरी आत्मरक्षा गर्न सकिन्छ भन्ने विधिका बारेमा सिकाइने प्रशिक्षक खातीले जानकारी दिइन् ।

तालीममा कक्षा १० मा अध्ययनरत ५० छात्राको सहभागिता छ । तालीम प्रदेशका अन्य सामुदायिक तथा निजी विद्यालयसम्म पुर्याउने इवाच नेपालकी अध्यक्ष सुमिता बस्नेतले जानकारी दिइन् ।
रासस