काठमाण्डु– प्रधानमन्त्री बालेन शाह (बालेन) ले आफू कालो चश्मा लगाएरै प्रतिनिधिसभा बैठकमा उपस्थित हुने...

पुरा पढ्नुहाेस्

global ime bank Long Banner Ad

मन्त्री सोडारीलाई बर्खास्त गर्नुका चार कारण

11.72K
shares

नेपाल कम्युनिस्ट पार्टी नेकपाभित्र गुटबन्दी झाङ्गिदै गएको छ । केन्द्रमा प्रधानमन्त्रीसहित तीन नेताको संरक्षकत्वमा गुटबन्दी चलिरहेको नेकपाको सत्ता र शक्तिको खेलमा प्रदेश सरकार पनि फस्दै गएको हो । यसको पछिल्लो उदाहरण हो– मन्त्री दीर्घबहादुर सोडारीको बर्खास्तगी ।

आवरणमा पदीय आचरणविपरीत कार्य गरेको भन्दै पदबाट हटाइएका सुदूरपश्चिम प्रदेशका सामाजिक विकासमन्त्री सोडारी गुटबन्दीको सिकार बनेको टिप्पणी भइरहेको छ । मन्त्रीलाई बर्खास्त गरिनुको कारणबारे यतिखेर नेकपाभित्र, जनस्तरमा र विपक्षी कांग्रेसमा पनि चर्चा भइरहेको छ । सोडारीलाई हटाउनुका मुख्य चार कारण यी हुन् :

पहिलो कारण : गुटबन्दी
तत्कालीन नेकपा एमाले कैलालीका अध्यक्षसमेत रहेका सोडारीका विषयमा मन्त्री नियुक्तिकै बखत अर्को गुटले असन्तुष्टि जनाएको थियो । असन्तुष्टिकै बाबजुत पार्टी अध्यक्ष तथा प्रधानमन्त्री केपी शर्मा ओलीको ठाडो निर्देशनमा उनलाई नियुक्त गरिएको थियो । सोही असन्तुष्टि झाङ्गिँदै जाँदा उनलाई बर्खास्त गर्नुपर्ने अवस्थासम्म पुगेको नेकपाका स्थानीय नेता बताउँछन् ।

नेकपाका प्रदेश अध्यक्ष कर्ण थापाका अनुसार मन्त्री सोडारीविरुद्ध पार्टीभित्रै पनि गुनासो बढ्दै गएको थियो । पार्टीले आन्तरिक रुपमा गुनासो छानबिन गर्दा पदअनुरुपको आचरण नगरेको पुष्टि भएकाले फिर्ता बोलाउने निर्णय गरिएको उनले बताए । उनले सामाजिक विकास मन्त्रालयका योजना सञ्चालन गर्दासमेत आफ्ना निकटका कार्यकर्तालाई मात्र हेरेको आरोप लाग्दै थियो । सोडारीलाई पटक–पटक पार्टीको नीतिअनुसार काम गर्न आग्रह गरे पनि बेवास्ता गरेकाले हटाउनुपरेको उनको प्रस्टोक्ति छ ।

दोस्रो कारण : पदीय मर्यादा
सुदूरपश्चिम प्रदेशका मुख्यमन्त्री त्रिलोचन भट्टले मन्त्री सोडारीले पदअनुरुपको आचरण नगरेकाले पदबाट बर्खास्त गरेको बताएका छन् । पटक–पटक आचरण सुधार्न निर्देशन दिए पनि नमानेकाले हटाउनुपरेको उनको प्रतिक्रिया छ ।

तेस्रो कारण : विवादास्पद व्यक्तिलाई संरक्षण
मन्त्री सोडारीको विभिन्न विवादास्पद व्यक्तिसँग साँठगाँठ रहेको आरोप पार्टीले लगाएको छ । विभिन्न आपराधिक गतिविधिमा संग्लन व्यक्तिलाई जोगाउन भूमिका खेलेकाले पनि उनलाई बर्खास्त गरिएको पार्टी उच्च स्रोतले जनाएको छ । विभिन्न आपराधिक गतिविधिमा संग्लनलाई छुटाउनका लागि जिल्लाका प्रहरी अधिकारीलाई पटक–पटक दबाब दिने गरेको पार्टीले जनाएको छ ।

चौथो कारण : पटक-पटक आलोचना
केही दिनअघि मात्रै गौरीगंगा नगरपालिकाको बडैपुरमा मन्त्री सवार गाडी दुर्घटना भएपछि समेत उनको चर्को आलोचना भएको थियो । गाडीमा मन्त्री सवार थिएनन् । चालकले मन्त्रीको गाडी आफ्ना आफन्तको काममा प्रयोग गरेका थिए । झण्डा फहराउँदै उनले गाडी हुइँकाएका थिए । मन्त्री सोडारी नौ महिने कार्यकालमा विभिन्न घटनामा विवादमा पनि तानिएका थिए । सुरुमा मन्त्रालयमै उल्टो झण्डा लगाउँदासमेत बेवास्ता गरेको भन्दै सोडारीको आलोचना भएको थियो ।

पार्टीको साधारण सदस्यबाट समेत निष्कासित
मन्त्रीबाट बर्खास्त दीर्घ सोडारीलाई नेकपाको साधारण सदस्यबाट समेत निष्कासित गरिएको छ । मंगलबार मन्त्रीबाट बर्खास्त भएका उनलाई साँझ नेकपा सुदूरपश्चिम प्रदेश कमिटीले साधारण सदस्यसमेत नरहने गरी पार्टीबाट निष्कासन गरिएको जनाएको छ ।

सोडारी कैलाली क्षेत्र नम्बर ४ ‘क’ बाट प्रदेश सभामा विजयी हुँदै सामाजिक विकासमन्त्री बनेका थिए । प्रदेश सरकारले उनलाई हटाएर कैलाली क्षेत्र नम्बर ४ को ‘ख’ बाट विजयी कृष्णराज सुवेदीलाई सामाजिक विकासमन्त्री नियुक्त गरिसकेको छ । पार्टी सदस्य नरहे पनि सोडारीको सांसद पद भने यथावत् छ ।

मन्त्री हटाउनु स्वाभाविक : कांग्रेस
प्रमुख प्रतिपक्षी नेपाली कांग्रेस सुदूरपश्चिम प्रदेश संसदीय दलका नेता डा. रणबहादुर रावलले मन्त्री हटाउनु संसदीय अभ्यासमा स्वाभाविक भएको प्रतिक्रिया दिएका छन् । न्युज कारोबारसँग कुरा गर्दै डा. रावलले नेकपाले मन्त्री हटाउनुभन्दा सरकारको समग्र कार्यप्रणाली नै परिवर्तन गर्न आवश्यक हरको बताए । सरकार गठन भएको नौ महिना बितिसक्दा पनि जनताको आशाअनुसार काम गर्न नसकेको भन्दै आचरण परिवर्तन नगरे सरकार नै परिवर्तन हुन सक्ने अवस्था आउने उनले चेतावनी दिए । अहिलेसम्मको अवस्था हेर्दा एकजना मन्त्री मात्रै होइन, समग्र सरकारले नै जनताको पक्षमा ठोस काम गर्न नसकेको मन्त्री रावलको भनाइ छ ।