आन्दोलनरत चिकित्सकले अस्पताल बाहिरै ओपीडी सेवा सुरु गरेका छन् । कर्मचारी समायोजनको विरुद्ध आन्दोलनमा उत्रेका सरकारी चिकित्सकले अस्पताल बाहिरै ओपीडी सेवा सुरु गरेका हुन् । चिकित्सकहरुले गत शुक्रबारदेखि आकस्मिक बाहेकका सेवा ठप्प पारेका छन् ।

उनीहरुको आन्दोलनका कारण बिरामीको बिचल्ली भएको छ । दैनिक ५० हजार बिरामीले उपचार सेवा नपाएको भन्दै डाक्टरहरुको आलोचना हुन थालेपछि अस्पताल परिसरमै ओपीडी सेवा सुरु गरेका हुन् । वीर अस्पतालका चिकित्सकले अस्पतालका टेवल, कुर्सी र उपकरणहरु अस्पतालबाहिर ल्याएर विरामीको जाँच गरिरहेका छन् ।

माग पूरा नभएसम्म बाहिरैबाट ओपीडी सेवा सञ्चानल गर्ने डाक्टरहरुले बताएका छन् । यसअघि बुधबार बिहान वीर अस्पताल प्रशासनले प्रहरी लगाएर ओपीडी विभागको टिकट काटेको थियो । चिकित्सकहरुले ओपीडी सेवा बन्द गरेको छैठौ दिन बुधबार बिहानबाट प्रशासनले प्रहरीको सहयोगमा ओपीडीको टिकट खुलाएको हो ।

सरकारले काममा नफर्किने चिकित्सकलाई कारबाही गर्ने चेतावनी दिएको छ । तर, चिकित्सकले माग सम्बोधन नभएसम्म आन्दोलन जारी राख्ने चेतावनी दिएका छन् । आन्दोलनको नेतृत्व सरकारी चिकित्सक संघ गोदानले गरेको छ ।

प्रकाशित समय : १८:३९ बजे