इन्डियन प्रिमियर लिग (आईपीएल) मा कोलकाता नाइट राइडर्स लगातार दोस्रो खेलमा पनि पराजित भएको छ । ओपनर शिखर धवनले नटआउट ९७ रन बनाएपछि दिल्ली क्यापिटल्सले कोलकतालाई ७ विकेटले हराएको हो ।

कोलकाताले दिएको १ सय ७९ रनको लक्ष्य दिल्लीले १८.५ ओभरमा ३ विकेट गुमाउँदै पुरा गर्यो । धवनले ९७ रन जोड्न ६३ बलमा ११ चौका र २ छक्का प्रहार गरे । पृथ्वी शाले १४ रन जोडे । कप्तान श्रेयस ऐर ६ रनमा आउट भए । तेस्रो विकेटका लागि धवन र ऋषभ पन्तले १ सय ५ रनको साझेदारी गरेका थिए । पन्तले ४६ रनको महत्वपूर्ण योगदान गरे । कोलिन इन्ग्रामले १४ रन बनाए । कोलकाताका लागि नितिश राना, प्रशिध कृष्णा र आन्द्रे रसलले १–१ विकेट हात पारे ।

टस हारेर ब्याटिङको निम्तो पाएको कोलकाताले २० ओभरमा ७ विकेट गुमाउँदै १ सय ७८ रन बनाएको थियो । कोलकाताका लागि शुभ्मन गिलले ६५ रनको महत्वपूर्ण योगदान गरेपनि त्यो जितका लागि पर्याप्त बनेन । ओपनर जो डेनली पहिलो बलमा नै बोल्ड हुँदै पभेलियन फर्किए । आन्द्रे रसलले ४५ रन जोडे । रोविन उथाप्पाले २८ रनको योगदान गरे । नितिश राना ११, कप्तान दिनेश कार्तिकले २, कार्लोस ब्रेथवेटले ६ रनमा आउट भए । पियुष चावला १४ रनमा अविजित रहे ।

दिल्लीका लागि किमो पल, क्रिस मोरिस र कागीसो रबाडाले समान २–२ विकेट लिए ।

प्रकाशित समय : १४:०७ बजे