महेन्द्रनगरका महिलाले बलात्कारीलाई कानुनी दायरामा ल्याउन दबाबस्वरुप धनुषाको इलाका प्रहरी कार्यालय घेराउ गरेका छन् । महेन्द्रनगरका सयौं महिला दिउँसो १ बजे जनकपुर–ढल्केवर सडकखण्डअन्तर्गत इलाका प्रहरी कार्यालयअगाडि टायर बालेर सडक अवरुद्ध गरेका छन् ।

क्षीरेश्वरनाथ नगरपालिका–५ का राजकुमार साहले आफ्नै १४ वर्षीया भतिजीलाई बेहोसको औषधी खुवाएर बलात्कार गरेको आरोपमा स्थानीय आक्रोशित भएका हुन् । बलात्कारपछि बालिकाको अवस्था नाजुक छ । अहिले पीडित बालिकाको जनकपुर अञ्चल अस्पतालमा उपचार भइरहेको छ । उपचारका क्रममा स्वास्थ्य अवस्था बिग्रँदै गएकाले बलात्कारीलाई कडा सजायको माग गर्दै स्थानीयवासीले प्रहरी कार्यालय घेराउ गर्दै सडक अवरुद्ध गरेका छन् ।

बलात्कारीलाई प्रहरीले बचाउन खोजेको खबर पाएकाले दोषीलाई कडाभन्दा कडा सजाय दिलाउन दबाबस्वरुप इलाका प्रहरी कार्यालय र सडक अवरुद्ध गरेको उनीहरुले बताएका छन् । प्रदर्शनकारीले प्रहरी प्रशासनविरुद्ध चर्को नाराबाजीसमेत गरिरहेका छन् ।

प्रकाशित समय : २१:१६ बजे