काठमाण्डु– प्रधानमन्त्री बालेन शाह (बालेन) ले आफू कालो चश्मा लगाएरै प्रतिनिधिसभा बैठकमा उपस्थित हुने...

पुरा पढ्नुहाेस्

global ime bank Long Banner Ad

बंगलादेशमा अवामी लिगका नेताका ५० भन्दा बढी घरमा आगजनी

1.28K
shares

काठमाडौं । बंगलादेशमा दुई विपक्षी नेताको हत्यापछि राजनीतिक हिंसा चर्किएको छ । बंगलादेश नेसनलिस्ट पार्टी (बीएनपी) सम्बद्ध व्यक्तिहरूले अवामी लिगका नेता तथा कार्यकर्ताका घर र पसलमा तोडफोड तथा आगजनी गरेको आरोप लागेको छ ।

नराइल जिल्लाको कालिया उपजिल्लास्थित बेन्दर चार गाउँमा शुक्रबार दिउँसो सुरु भएको आक्रमण रातिसम्म जारी रहेको थियो । आक्रमणकारीले गतिविधिमा प्रतिबन्ध लगाइएको अवामी लिगका नेता तथा कार्यकर्तासँग सम्बन्धित सम्पत्तिलाई निशाना बनाएका थिए । आक्रमणमा पूर्वसांसद बीएम कबिरुल हक मुक्तिको पुख्र्यौली घर र कालिया नगरपालिकाका पूर्वमेयर फकिर मुसफिकुर रहमान लिटनको निवाससमेत परेको छ ।

अग्नि नियन्त्रण सेवाका अनुसार करिब २० देखि २५ घरपरिवारका ५० भन्दा बढी आवासीय संरचनामा आगलागीबाट क्षति पुगेको छ । बजारका केही पसलमा पनि आगजनी गरिएको छ । यद्यपि, स्थानीय प्रशासनले १५ देखि २० घरमा तोडफोड भएको र केही संरचनामा आगो लगाइएको जनाएको छ ।

गत बुधबार बीएनपीसम्बद्ध दुई नेताको हत्या भएपछि हिंसा भड्किएको हो । कालिया नगरपालिका कृषक दलका महासचिव साहिन मोल्लाह र जातीयतावादी सामाजिक सांस्कृतिक संगठन (जासास) का कालिया उपजिल्ला इकाइका महासचिव सोहेल मोल्लाहमाथि बेन्दर चारको बटटोला चोकमा मोटरसाइकल ¥यालीका क्रममा आक्रमण भएको थियो । गम्भीर घाइते भएका दुवैलाई उपचारका लागि खुल्नाका अस्पताल लगिएको थियो, जहाँ उनीहरूको मृत्यु भएको थियो ।

स्थानीयले शुक्रबारको आक्रमणमा बीएनपीसम्बद्ध व्यक्तिहरू संलग्न रहेको आरोप लगाए पनि स्थानीय बीएनपी नेताहरूले त्यसलाई अस्वीकार गरेका छन् । कालिया उपजिल्ला बीएनपीका महासचिव एसएम वाहिदुज्जमान मिलुले पार्टीका नेता तथा कार्यकर्ताले आगजनी आयोजना वा सहभागिता जनाएको भन्ने आरोप अस्वीकार गरेका छन् ।

प्रहरीका अनुसार शुक्रबार साँझ हत्या भएका नेताका आफन्तसहित आक्रोशित समूह गाउँमा भेला भएर हत्यामा संलग्न रहेको आरोप लागेका अवामी लिगका कार्यकर्ताका घरमा आक्रमण गरेको थियो । स्थिति नियन्त्रणमा लिन थप प्रहरी परिचालन गरिएको थियो ।

यसैबीच, नराइल प्रहरीले हिन्दू समुदायका घर तथा व्यवसायमा आक्रमण भएको भन्ने सामाजिक सञ्जालका दाबीलाई अस्वीकार गरेको छ । प्रहरीले त्यस्ता दाबी भ्रामक रहेको र पुराना तथा कृत्रिम बुद्धिमत्ता (एआई) बाट तयार गरिएका भिडियो प्रयोग गरेर घटनालाई गलत रूपमा प्रस्तुत गरिएको जनाएको छ ।

पूर्वप्रधानमन्त्री शेख हसिनाको आगामी डिसेम्बरमा स्वदेश फर्किने चर्चाबीच बंगलादेशमा राजनीतिक तनाव थपिएको छ । हिंसात्मक घटनापछि सीमा सुरक्षा बल (बीजीबी) ले विभिन्न जिल्लामा शान्ति सुरक्षा कायम गर्न ९६ प्लाटुन सुरक्षाकर्मी परिचालन गरेको छ ।

यसैबीच, भारतीय विदेश मन्त्रालयले बंगलादेशको आन्तरिक राजनीतिक घटनाक्रमबारे टिप्पणी नगर्ने जनाएको छ । भारतले भने बंगलादेशसँग सकारात्मक र रचनात्मक सम्बन्ध कायम राख्ने चाहना व्यक्त गरेको छ । हसिना सन् २०२४ अगस्टदेखि भारतमा बस्दै आएकी छन् । उनी पक्षका कानुनी प्रतिनिधिले नयाँ दिल्लीस्थित बंगलादेशी उच्चायोगमा उनको नयाँ राहदानी र राष्ट्रिय परिचयपत्रका लागि पहल गरेका छन् ।