काठमाण्डु– प्रधानमन्त्री बालेन शाह (बालेन) ले आफू कालो चश्मा लगाएरै प्रतिनिधिसभा बैठकमा उपस्थित हुने...

पुरा पढ्नुहाेस्

global ime bank Long Banner Ad

टमाटरखेतीमा अब्बल बन्दै टोड्केका किसान

357
shares

इलाम। इलामको माङसेबुङ गाउँपालिका–६ स्थित टोड्के गाउँ व्यावसायिक टमाटरखेतीको केन्द्र बन्दै गएको छ । गाउँका ८० घरपरिवार व्यावसायिक टमाटरखेतीमा संलग्न छन् । यहाँबाट वार्षिक रु एक करोड २० लाखभन्दा बढीको टमाटर बिक्री हुने गरेको छ ।

स्थानीय किसान प्रदीप राईले १० वर्षदेखि व्यावसायिक रूपमा टमाटरखेती गर्दै आउनुभएको छ । निरन्तरको मेहनत र अनुभवले उनलाई यस क्षेत्रको अगुवा टमाटर किसानका रूपमा स्थापित गरेको छ । गत वर्ष चार हजार ५०० बोट टमाटर लगाएका उनले बिक्रीबाट तीन लाख ५० हजार आम्दानी गर्नुभएको थियो । उत्पादनको सुरुआतमा प्रतिकेजी ५० र सिजनको अन्त्यतिर ९० सम्ममा टमाटर बिक्री गरेका थिए ।

यस वर्ष उनले खेती विस्तार गरी १५ रोपनी जमिनमा सात हजार ५०० बोट टमाटर लगाएको छन् । अहिले अगुवा बोटमा उत्पादन सुरु भइसकेको छ । यस वर्ष करिब १० हजार केजी टमाटर उत्पादन हुने उहाँको अनुमान छ । हाल प्रतिकेजी ५० का दरले टमाटर बिक्री भइरहेको छ । गत वर्षकै हाराहारीमा मूल्य कायम रहे सात लाखभन्दा बढी आम्दानी हुने उनले अपेक्षा गरेका छन् ।

टमाटरखेतीबाटै घरखर्च र छोराछोरीको पढाइ खर्च जुटाउँदै आएकी अर्की किसान मनिषा राईले गत वर्ष चार लाख आम्दानी गरेका थिए। उनले यस वर्ष पनि तीन हजार बोट टमाटर लगाएको छन् । पूर्वकार्यपालिका सदस्यसमेत रहेकी राईका अनुसार टोड्केका अधिकांश किसानको घरव्यवहार टमाटरखेतीबाट प्राप्त आम्दानीमा निर्भर हुने गरेको छ ।

त्यस्तै, किसान विनोद राईले यस वर्ष पाँच हजार बोट टमाटर लगाएको छन् । यसअघि दुईदेखि तीन हजार बोटसम्म खेती गर्दै आएका उनले टमाटरबाट राम्रो आम्दानी हुन थालेपछि खेती विस्तार गरेका हुन् । बजार मूल्य राम्रो पाए आम्दानी पनि बढ्ने उनको अपेक्षा छ ।

टोड्के टोलका ८० घरपरिवार नै व्यावसायिक टमाटरखेतीमा संलग्न रहेको वडाध्यक्ष प्रदीप साङपाङले बताए । उनका अनुसार यहाँबाट वार्षिक एक करोड २० लाखभन्दा बढीको टमाटर बिक्री हुने गरेको छ । टोड्केलाई टमाटरको पकेट क्षेत्रका रूपमा विकास गर्ने सोच रहेको उनले बताए ।

टमाटरखेतीबाट अन्य अन्नबालीको तुलनामा राम्रो आम्दानी हुन थालेपछि किसान यसतर्फ आकर्षित भएका हुन् । टमाटरको खेती वर्षमा करिब छ महिना मात्र हुने भएकाले बाँकी समयमा मकैखेती गर्ने गरिएको स्थानीय किसान बताउँछन् । यसरी फरकफरक बाली लगाउँदा बाली चक्र कायम रहने र जमिनको गुणस्तर जोगाउन सहयोग पुग्ने उनीहरूको भनाइ छ ।

टोड्केमा टमाटरको मुख्य उत्पादन असोजदेखि पुससम्म हुने गर्दछ । रोपेको करिब ७० दिनमा फल दिन थाल्ने टमाटरको एउटा बोटबाट छ केजीसम्म उत्पादन हुने किसानको अनुभव छ ।

यहाँ उत्पादित टमाटर स्थानीय चिसोपानी पञ्चमी बजारका साथै व्यापारीमार्फत झापाको दमकसम्म बिक्रीका लागि पुग्ने गरेको छ । निर्माणाधीन बिपी मार्गको स्तरोन्नतिसँगै यातायात सुविधा सहज भएकाले बजारसम्म उत्पादन पु¥याउन सजिलो भएको स्थानीय किसान मनुकुमार राईले बताए । व्यापारीले बगानबाटै टमाटर खरिद गरेर लैजाने गरेकाले उत्पादन बिक्री नहुने चिन्ता नरहेको उनको भनाइ छ ।