काठमाडौं । पुष्पलाल इन्भेष्टमेन्ट कम्पनी लिमिटेडले सर्वसाधारणका लागि १५ लाख कित्ता साधारण शेयर निष्कासन गर्ने भएको छ । कम्पनीले प्रतिकित्ता १ सय रुपैयाँ अंकित मूल्यका दरले १५ करोड रुपैयाँ बराबरको शेयर निष्कासन गर्न लागेको हो ।

शेयर निष्कासन तथा बिक्री प्रबन्धकका रूपमा कम्पनीले लक्ष्मी सन्राइज क्यापिटल लिमिटेडलाई नियुक्त गरेको छ । यससम्बन्धी सम्झौतामा लक्ष्मी सन्राइज क्यापिटलका अध्यक्ष राजीव सापकोटा र पुष्पलाल इन्भेष्टमेन्ट कम्पनीका अध्यक्ष लालप्रसाद सावा लिम्बुले हस्ताक्षर गरेका छन् । सम्झौता हस्ताक्षर कार्यक्रममा लक्ष्मी सन्राइज क्यापिटलका प्रमुख कार्यकारी अधिकृत विजयलाल श्रेष्ठ पनि उपस्थित थिए ।

पुष्पलाल इन्भेष्टमेन्ट कम्पनीले नेपालको अर्थतन्त्रमा दिगो वृद्धि र विकासमा योगदान पुर्‍याउने उद्देश्यले विभिन्न क्षेत्रमा लगानी गर्दै आएको जनाएको छ । कम्पनीले ऊर्जा, सूचना प्रविधि, सञ्चार तथा पर्यटनसँग सम्बन्धित आयोजनालाई आफ्नो लगानीको प्राथमिकतामा राखेको छ ।

‘सानो लगानी, ठूलो अवसर, राष्ट्र निर्माणमा’ भन्ने नारासहित अघि बढिरहेको कम्पनीले सम्भावनायुक्त विभिन्न क्षेत्रमा रणनीतिक लगानी गर्दै आएको छ ।

सर्वसाधारणका लागि शेयर निष्कासनपछि कम्पनीको लगानीमा सर्वसाधारणको समेत सहभागिता बढ्ने अपेक्षा गरिएको छ । शेयर निष्कासनको व्यवस्थापन तथा बिक्रीसम्बन्धी काम लक्ष्मी सन्राइज क्यापिटलले गर्नेछ ।