काठमाडौं– करिब २४० यात्रु सवार एक इन्डोनेसियाली यात्रुवाहक जहाज जाभा सागरमा सम्पर्कविहीन भएको छ । इन्डोनेसियाली खोज तथा उद्धार अधिकारीहरूले आइतबार जहाजसँग सम्पर्क टुटेको जानकारी दिएका छन् ।

दक्षिण कालीमन्तान प्रान्तको खोज तथा उद्धार निकायका अनुसार जहाज पूर्वी जाभाको सुराबायाबाट दक्षिण कालीमन्तानको बान्जारमासिनतर्फ जाँदै थियो । यात्राका क्रममा जहाजसँग सम्पर्क विच्छेद भएको हो ।

अधिकारीहरूका अनुसार जहाजको अन्तिम ज्ञात अवस्थिति बान्जारमासिनस्थित खोज तथा उद्धार केन्द्रबाट करिब ८० समुद्री माइल टाढा रहेको थियो ।

जहाज सम्पर्कविहीन भएपछि खोज तथा उद्धारका लागि एउटा उद्धार जहाज घटनास्थलतर्फ पठाइएको छ । उद्धार टोलीले जहाजको अवस्थिति पत्ता लगाउनुका साथै त्यसमा सवार यात्रुहरूको खोजी गरिरहेको छ ।

प्रारम्भिक जानकारीअनुसार सम्पर्क टुट्नुअघि जहाजले खराब मौसमको सामना गरेको थियो । समुद्री क्षेत्रमा देखिएको प्रतिकूल मौसमका कारण जहाजको यात्रा प्रभावित भएको हुन सक्ने अधिकारीहरूले बताएका छन् ।

हालसम्म जहाजमा सवार यात्रुहरूको अवस्था र सम्भावित मानवीय क्षतिबारे कुनै जानकारी प्राप्त भएको छैन । जहाजमा ठूलो सङ्ख्यामा यात्रु सवार रहेकाले खोज तथा उद्धार अभियानलाई तीव्र पारिएको अधिकारीहरूले जनाएका छन् ।

प्रकाशित समय : ११:०८ बजे