काठमाडौं । विनाशकारी आकस्मिक बाढी र पहिरोपछि रसुवा, नुवाकोट र धादिङलगायतका बासिन्दा तहसनहस भएको जीवन पुनःस्थापित गर्न र आधारभूत सेवा सञ्चालनमा ल्याउन संघर्ष गरिरहेका छन् ।

चीनसँगको सीमाक्षेत्रमा हिमनदी खस्दा आएको बाढीले घर, पुल तथा सीमा क्षेत्रमा रहेका बस्तीहरू नै बगाएको थियो।

त्रिशूली क्षेत्रमा मात्रै बाढीले पानी, ढुंगा र गेग्रानसहितको भीषण भेल ल्याउँदा करिब तीनसय घर क्षतिग्रस्त भएका छन् । आफ्ना आफन्त गुमाएका परिवार शोकमा छन् भने धेरै स्थानीय अझै बेपत्ता छन् ।

बाँचेकाहरूले घरका सामान, पैसा र लत्ताकपडासमेत गुमाएका छन् । पसल सञ्चालकहरूले केही मिनेटमै आफ्नो सम्पूर्ण सामान बाढीले बगाएको देख्नुपरेको छ ।

विपद्का कारण विद्यालय गएका बालबालिका घर फर्कन सकेका छैनन् । धेरै परिवार औषधि र खाद्यान्नको पहुँचबाट समेत वञ्चित भएका छन् भने इन्धन आपूर्तिसमेत अवरुद्ध भएको छ ।

त्रिशूली नदीमाथिका पुलहरू बाढीले बगाएपछि पूरै समुदाय दुईतर्फ विभाजित भएका भएका छन् । बाढीका कारण छुट्टिएका गाउँहरूलाई पुनः जोड्न अहिले जिपलाइन निर्माण गर्ने काम भइरहेको छ । यसबाट बिस्तारै आवतजावत सहज बन्दै गएको छ ।

स्थानीय बासिन्दा मैसिङ तामाङले भने, ‘यसले अवस्था केही राम्रो बनाउनेछ भन्ने हामी सबैको आशा छ ।’

अर्की स्थानीयवासी सूर्यकुमारी तामाङले भनिन्,‘हामीले लामो समय पर्खनुपर्छ, तर यसले धेरै सहयोग पुगेको छ ।’

अर्का स्थानीयवासी सुमन सिंहले भने गाउँमा सवारीसाधनको आवतजावत सहज हुने अपेक्षा गरेका छन् ।

उपत्यकाको माथिल्लो क्षेत्रमा नेपाली सेना अस्थायी पुल निर्माण गरी आवतजावत पुनः सञ्चालन गराउने काममा तीव्रताका साथ जुटेको छ । यता, प्राविधिक टोलीले लामो समयदेखि अवरुद्ध विद्युत् सेवा पुनः सञ्चालन गर्न र टेलिफोन सम्पर्क पुनःस्थापित गर्न काम गरिरहेको छ ।

तर ठूलो मात्रामा भौतिक संरचना र सम्पत्ती नष्ट भएकाले पूर्ण पुनर्निर्माण तत्कालै सम्भव देखिँदैन । अहिलेका लागि बाढीपीडित स्थानीयका लागि जीवनलाई सामान्य अवस्थामा फर्काउनु नै सबैभन्दा ठूलो चुनौती बनेको छ।(सीसीटीभीप्लस)