काठमाडौं । सामसङ नेपालले नयाँ स्मार्टफोन बिक्रीसँगै पुराना मोबाइल उपकरणको पुनःप्रयोग बढाउने योजना अघि सारेको छ । कम्पनीले ट्रेड–इनमार्फत संकलन हुने पुराना स्मार्टफोन तथा अन्य उपकरणलाई परीक्षण र मूल्यांकन गरी आवश्यकताअनुसार पुनःप्रयोगमा ल्याउने जनाएको हो ।

सामसङले सोमबार नेपालमा नयाँ ग्यालेक्सी जेड सिरिज सार्वजनिक गर्दै पुराना उपकरण व्यवस्थापनलाई पनि आफ्नो ‘ओनरसिप इकोसिस्टम’को हिस्सा बनाएको जनाएको हो । यसअन्तर्गत ग्राहकले पुरानो फोन साटेर नयाँ उपकरण खरिद गर्न सक्नेछन् भने ट्रेड–इनबाट प्राप्त पुराना उपकरणलाई पुनःप्रयोगयोग्य बनाउने प्रक्रिया अघि बढाइनेछ ।

कम्पनीका अनुसार ट्रेड–इनमार्फत प्राप्त उपकरणलाई एप्कुडो तथा स्थानीय साझेदारको सहकार्यमा परीक्षण र मूल्यांकन गरिनेछ । प्रयोग गर्न मिल्ने उपकरणलाई आवश्यकताअनुसार पुनः प्रयोगमा ल्याउने तथा पुनःप्रयोग गर्न नसकिने उपकरणको उचित व्यवस्थापन गर्ने योजना कम्पनीको छ ।

यसबाट स्मार्टफोन तथा विद्युतीय उपकरणबाट उत्पन्न हुने ई–वेस्ट घटाउन सहयोग पुग्ने सामसङको अपेक्षा छ । मोबाइल फोनको प्रयोग अवधि सकिएपछि त्यसलाई सिधै फाल्ने प्रवृत्तिको सट्टा पुनःप्रयोग तथा पुनःचक्रणमार्फत उपकरणको उपयोग अवधि बढाउने कम्पनीको रणनीति देखिएको छ ।

सामसङ नेपालले नयाँ फोल्डेबल फोनको बिक्रीलाई केवल नयाँ उपकरण बजारमा पठाउने विषयका रूपमा मात्र नहेरी ग्राहकको पुरानो उपकरणदेखि नयाँ उपकरण खरिदसम्मको सम्पूर्ण प्रक्रियालाई एउटै प्रणालीमा जोड्ने प्रयास गरेको जनाएको छ । नयाँ ग्यालेक्सी जेड फोल्ड ८ अल्ट्रा, ग्यालेक्सी जेड फोल्ड ८ र ग्यालेक्सी जेड फ्लिप ८ सार्वजनिक गर्दै कम्पनीले ट्रेड–इन योजनामार्फत ग्राहकलाई पुरानो फोन साट्दा आर्थिक भारसमेत घटाउने सुविधा उपलब्ध गराएको छ ।

कम्पनीका अनुसार एक्सचेन्ज बोनसमार्फत ग्राहकले १५ हजार रुपैयाँसम्म अतिरिक्त लाभ लिन सक्नेछन् । सामसङ नेपालका लागि पुराना उपकरणको पुनःप्रयोग वातावरणीय व्यवस्थापनको विषय मात्र नभई नयाँ स्मार्टफोन बिक्रीसँग जोडिएको व्यावसायिक रणनीतिसमेत बनेको छ । यसले ग्राहकलाई नयाँ फोन खरिदका लागि प्रोत्साहित गर्नुका साथै प्रयोगमा नरहेका पुराना उपकरणलाई पुनः बजारमा ल्याउने वा उचित व्यवस्थापन गर्ने उद्देश्य राखेको छ ।